Zaman-zaman müəllimlər haqqında müdrik sözlər, gözəl kəlamlar deyənlər çox olmuşdur. Platon deyirdi ki, müəllimlik hər şeydən əvvəl bir tarixi sənətdir.

Həqiqətən, müəllimlik ən şərəfli məsuliyyətli və müqəddəs peşədir. Bu peşəni seçənlər də öz əxlaqi keyfiyyətləri ilə həmişə həmin məsuliyyəti dərk edirlər.

Məhz bu peşəni öz savadı və təhsildəki uğurları ilə davam etdirən müəllimlərdən biri də  Qobustan rayonunun Bədəlli kənd Okean Seyidov adına tam orta ümumtəhsil məktəbinin direktoru Şahid Muradlıdır.

Şahid Muradlı Bakı şəhərində anadan olub. Orta məktəbi bitirdikdən sonra təhsilini o vaxtkı Qafqaz Universitetinin ibtidai təhsilin pedaqogikası və metodikası fakultəsində davam etdirib. Ali təhsilini əla qiymətlərlə başa vurduqdan sonra İsmayıllı rayonunun İstisu kənd tam orta ümumtəhsil məktəbində işə başlayıb. İlk günlərdən fəallığına görə şagird və müəllim kollektivinin dərin hörmətini qazanıb.

Şahid müəllim öz işi ilə yanaşı Elm və Təhsil Nazirliyi tərəfindən keçirilən müsabiqələrdə yaxından iştirak edərək , ilk uğurlu addımlarını atır.

2018-ci və 2019-cu illərdə “İlin gənc müəllimi” müsabiqəsinin qalibi olur. 2021-ci ildə “Təhsildə inkişaf və innovasiya” üzrə V qrant müsabiqəsində qalib kimi yer tutur. 2022-ci ildə də bu müsabiqənin yenidən qalibi kimi tanınır. Kembric Universiteti tərəfindən təşkil olunmuş müsabiqədə də qaliblər sırasında olmuşdur. Bu uğurlarına görə o dəfələrlə Elm və Təhsil Nazirliyi tərəfindən təşəkkürnamə almışdır. Bir müddət Azərbaycan Gənc Müəllimlər Assosiasiyasının sədr müavini kimi də fəaliyyət göstərmişdir.

Şahid müəllim 2025-ci ildə Elm və Təhsil Nazirliyi, eləcə də ADA Universiteti tərəfindən təşkil olunmuş “ Bir gəncin manifesti”proqramında Azərbaycan komponentini uğurla başa vurduğundan Avropa mərhələsində iştirak etmək hüququ qazanmışdır. Avropa təhsil təcrübəsini öyrənmək üçün 2026-cı ilin aprel ayında Şahid müəllim qrup daxilində 6 gün Estoniyada, 5 gün isə Finlandiyada olmuşdur. Orada təhsilə müasir yanaşma metodları , müəllimə olan yüksək etimadın, tədris prosesində praktiki yanaşmanın və idarəetmə mexanizmləri ilə yaxından tanış olmuşdur.

Müəllim bildirdi ki, hər iki ölkənin təhsil müəssisələrinin bir neçəsində olduq və təcrübə mübadiləsi apardıq. Finlandiyada təhsilin daha güclü olması önə çəkildi. Onun vaxtında oxuduğu , Finlandiyadan bəhs olunan “Bəyaz zanbaqlar ölkəsi” əsəri bu ölkə ilə təəssüratını bir daha artırmışdır.

Şahid müəllim son olaraq qeyd etdi ki, bütün bunlar qazanılan təcrübənin Azərbaycan təhsil mühitinə inteqrasiya etmək məqsədi daşıyır.

Biz də öz növbəmizdə Şahid Muradlının qazandığı bu uğurları ürəkdən alqışlayırıq.

Məhəmməd Bayramov
Azərbaycan Jurnalistlər Birliyinin üzvü