Gərgin araşdırmalar, böyük zəhmət hesabına işıq üzü görmüş nəşrlər millətin, cəmiyyətin strateji hədəflərinə hesablanır. Bu sıradan “Nərimanlı... getməsək də, gəlməsək də, o – bizim kəndimizdir” adlı Göyçə mahalından bəhs edən kitab diqqətimizi cəlb etdi. Həmin kitabda Basarkeçər rayonu Nərimanlı kəndinin tarixindən, maddi və mədəni resurslarından, əhalisindən,  Azərbaycanın intellektual mühitinə verdiyi töhfələrdən  və digər məqamlardan söhbət açılır.  

Xatırladırıq ki, kitbın müəllifi tanınmış ziyalı Niftalı Ağakişi oğlu Quliyevdir. O, 1954-cü il oktyabrın 1-də Azərbaycanın dilbər guşələrindən olan Göyçə mahalının Basarkeçər rayonunun Nərimanlı kəndində doğulub. 1961-ci ildə Nərimanlı kəndində orta məktəbin birinci sinfinə gedib. 1971-ci ildə İrəvan Dövlət Pedaqoji İnstitutunun Azərbaycan dili və ədəbiyyatı fakültəsinə daxil olub. Ali təhsilini başa vurduqdan sonra ilk əmək fəaliyyətinə də Göyçə mahalında başlayıb. Niftalı müəllim gənc nəslin vətənpərvər ruhda yetişməsində böyük əmək sərf etdiyi kimi, belə bir mükəmməl kitabın ortaya çıxmasına da nail olub.

Xatırladırıq ki,  “Nərimanlı... getməsək də, gəlməsək də, o – bizim kəndimizdir” kitabı 3 ilə ərsəyə gəlib. Kitaba ön söz yazan professor Nuru Bayramovun bir fikri diqqətimizi cəlb etdi. O, yazırdı: “ Tarix yazılırsa yaddaş olur, yazılmırsa təhrif olunur”.  Gerçəkdən tariximizi yazmasaq, öyrənməsək təhrif olar, yaddan çıxar. Ona görə, bütünlüklə tariximizi peşəkar səviyyədə yazmalıyıq və  “Nərimanlı... getməsək də, gəlməsək də, o – bizim kəndimizdir” kitabı daxil olmaqla yazılmış kitabları oxumalıyıq.  Xüsusilə, Qərbi Azərbaycanla bağlı həqiqətlərin dünya ictimaiyyətinə və gələcək nəsillərə çatdırılması üçün bu cür əsərlər mühüm əhəmiyyət kəsb edir.

Fact-info.az