Ermənistan-Azərbaycan sülh prosesinin irəliləməsinin əsas aspektlərindən biri əvvəlcədən razılaşdırılmış addımların ardıcıllığıdır. Bu gün biz bu gündəliyin vahid və uzunmüddətli olması barədə mövqeyi eşitdik.

Bu sözləri Cənubi Qafqaz Tədqiqatlar Mərkəzinin direktoru Fərhad Məmmədov Azərbaycan və Ermənistan vətəndaş cəmiyyətlərinin nümayəndələrinin iştirakı ilə təşkil olunan ikitərəfli dəyirmi masa çərçivəsində keçirilən mətbuat konfransı zamanı deyib.

Onun fikrincə, istər iqtisadi sahədə, istər vətəndaş cəmiyyəti institutları arasında qarşılıqlı əlaqə çərçivəsində, istərsə də Azərbaycan və Ermənistan diplomatları arasında siyasi danışıqlar formatında atılan hər bir addım sülh gündəliyinə töhfə verir.

Sülh prosesinə ictimai baxışla bağlı F.Məmmədov hesab edir ki, bu, ən mürəkkəb sahədir.

“Bu, vaxt, ardıcıl hərəkətlər və səbir tələb edir. Hər dəfə cəmiyyətlərimizdə bu prosesin mahiyyətini və əhəmiyyətini anlamağa başlayan insanların sayı artır. İnanıram ki, bu fəaliyyət bu göstəricilərin artmasına töhfə verəcək”, - deyə o qeyd edib.