Azərbaycan Respublikası Müharibə, Əmək və Silahlı Qüvvələrin Veteranları Təşkilatının (Azərbaycan Respublikasının Veteranlar Təşkilatı) dəstəyilə milli təhlükəsizlik orqanlarının sabiq əməkdaşı, Polkovnik İlqar Əhməd oğlu Quliyevin 70 illik yubileyinə həsr olunan tədbir keçirilib. Tədbiri Azərbaycan Respublika Veteranlar Təşkilatının sədri, ehtiyatda olan Polkovnik, İlqar Quliyevin ömür yolu barədə yenicə nəşr edilən "Zabit ömrü" kitabının baş məsləhətçisi Cəlil Xəlilov açdı. Azərbaycanın Dövlət Himni səsləndirildi, Ölkəmizin ərazi bütövlüyünün bərpası uğrunda gedən döyüşlər zamanı şəhid olanların əziz xatirəsi, həmçinin, mərhum polkovnik İlqar Quliyevin əziz xatirəsi 1 dəqiqəlik sükutla yad edildi. İlqar Quliyevin ömür yoluna həsr edilən videoçarx nümayiş olundu. Polkovnik Cəlil Xəlilov dedi: 

-"Dəyərli tədbir iştirakçıları, mən Sizə İlqar Quliyevin şəxsi və işgüzar keyfiyyətləri haqqında danışmaq istərdim. O zaman mən Dövlət Sərhəd Qoşunları Komandanının müavini vəzifəsində çalışırdım. İ. Quliyev isə "Sərhəd" qəzeti redakdiyasında. İlqar müəllim öz işi üçün yaranmışdı.Ona həvalə olunan işi həcminə baxmadan eyni qaydada, eyni təmkinlə aparırdı. İlqar müəllim sözübütöv insan idi, necə deyərlər, sözü onun imzası idi.Şəxsiyyət kimi hərtətəfli olması köməyinə çatırdı.O, Vətənini sonsuz məhəbbətlə sevirdi, milli düşüncəli vətənpərvər idi."

"Azərbaycanın fədakarlıq məktəbi" layihəsinin rəhbəri, ehtiyatda olan polkovnik Elşad Həsənov, ehtiyatda olan polkovnik, yazıçı-jurnalist Mahir Cavadlı, ehtiyatda olan polkovnik Elşad Qoca (İsayev), ehtiyatda olan polkovnik Lətif Babayev, yazıçı-jurnalist Nurəddin Ədiloğlu, yaxın qohumu, pedaqoq Ramiz Mikayılov çıxış edərək İlqar Quliyevlə bağlı xatirələrini söylədilər.

"Zabit ömrü" kitabının müəllifi, yazıçı - jurnalist Azər Hacıbəyli ( Səlimov) İlqar Quliyevin şərəfli ömür yolundan danışdı. Müəllif qeyd etdi ki, bu kitab İlqar Quliyevin 70 illik yubileyinə bir hədiyyədir. Kitabın məsul redaktoru Rövşən Həsənov dedi:-""Zabit ömrü" döyüş yolu keçmiş bir qrup zabitin əməyinin bəhrəsidir, ailə üzvləri, dostları və həmkarlarının ürək sözləridir, bir əsrlə məhdudlaşan adi insan həyatı haqqında deyil, xatirələrdə daim var olacaq Azərbaycan zabitinin, hərbçi - ziyalının əbədiyaşarlılıq hekayəsidir."

İlqar Quliyevin ailə üzvləri adından çıxış edən qızı Aysel xanım atasının xatirəsini əziz tutanların hər birinə öz təşəkkürünü bildirdi.

Şamil Sabiroğlu,

Mövsümağa Ədalət oğlu