Özbəkistan ilə Azərbaycan arasında münasibətlər son illərdə çox dinamik şəkildə inkişaf edərək keyfiyyətcə yeni səviyyəyə çıxır.

Bu barədə Özbəkistan Prezidenti yanında Təhlükəsizlik Şurası katibinin müavini – Prezidentin xarici siyasət məsələləri üzrə xüsusi nümayəndəsi Əbdüləziz Kamilov jurnalistlərə verdiyi müsahibədə bildirib.

Onun sözlərinə görə, əməkdaşlığın intensivləşməsi əsasən iki ölkə liderləri - Özbəkistan Prezidenti Şavkat Mirziyoyev ilə Azərbaycan Prezidenti İlham Əliyev arasında mövcud olan yaxın və etibarlı münasibətlərdən irəli gəlir.

“Bu gün ölkələrimiz arasında ən yüksək əməkdaşlıq və etimad səviyyəsi qurulub. Bu münasibətlər müttəfiqlik xarakteri daşıyır. İqtisadi əməkdaşlıq fəal şəkildə inkişaf edir və humanitar əlaqələr genişlənir”, - deyə o qeyd edib.

Əbdüləziz Kamilov vurğulayıb ki, Özbəkistan və Azərbaycan hazırda təkcə ikitərəfli münasibətləri inkişaf etdirmək üçün deyil, həm də iki böyük region - Mərkəzi Asiya ilə Cənubi Qafqaz arasında əməkdaşlığı gücləndirmək üçün çalışır.

“Məqsədimiz Mərkəzi Asiyanı Cənubi Qafqazla birləşdirərək nəticə etibarilə yeni geosiyasi və geoiqtisadi məkan yaratmaqdır. Bu istiqamətdə Azərbaycan Prezidentinin Özbəkistana səfəri və Mərkəzi Asiya sammitində iştirakı zamanı səmimi qarşılıqlı anlaşma əldə edilib”, - deyə xüsusi nümayəndə bildirib.

O qeyd edib ki, bu gün Mərkəzi Asiya ölkələri ilə Azərbaycan arasında əməkdaşlıq yeni səviyyəyə yüksəlir: “Deyə bilərik ki, artıq biz beş Mərkəzi Asiya dövləti deyilik, qardaş Azərbaycanla birlikdə altı dövlətik”.

Təhlükəsizlik Şurası katibinin müavini, həmçinin Qlobal Bakı Forumunun aktual qlobal məsələlərin müzakirəsi üçün nüfuzlu beynəlxalq platforma kimi əhəmiyyətini qeyd edib.

“Özbəkistan nümayəndə heyəti Qlobal Bakı Forumunda ilk dəfə iştirak edir. Fürsətdən istifadə edərək, səmimi qonaqpərvərliyinə və bu tədbirin əla təşkilinə görə azərbaycanlı qardaşlarımıza səmimi təşəkkürümü bildirmək istəyirəm. Onlar dialoq üçün unikal beynəlxalq platforma yaratmağa nail olublar”, - deyə o vurğulayıb.

Əbdüləziz Kamilovun fikrincə, bugünkü mürəkkəb və gözlənilməz beynəlxalq mühitdə bu cür platformaların mövcudluğu xüsusilə vacibdir: “Bəzən dialoqun olmaması dövlətlər və liderlər arasında anlaşılmazlıqlara səbəb olur ki, bu da qarşıdurmaya və hətta münaqişəyə səbəb ola bilər. Bu cür forumlar bizə fikir mübadiləsi, müzakirələr aparmağa və qarşılıqlı anlaşma tapmağa imkan verir”.

O, həmçinin Azərbaycan Prezidenti İlham Əliyevin forumdakı çıxışına diqqət çəkib. “Azərbaycan Prezidenti çıxışında beynəlxalq münasibətlərin inkişafı üçün təhlükəsizliyin və sabitliyin strateji əhəmiyyətini aydın şəkildə qeyd edib. Məhz bu amillər dövlətlər arasında əməkdaşlığın genişləndirilməsi üçün ən vacib şərtdir”, - deyə o bildirib.

Əbdüləziz Kamilov, eyni zamanda, nəqliyyat dəhlizlərinin, xüsusən də Orta Asiya ilə Cənubi Qafqazın birləşdirilməsində mühüm rol oynayan Orta Dəhlizin inkişafına da xüsusi diqqət yetirildiyini diqqətə çatdırıb.

“Bu məsələyə xüsusi panel həsr olunub. Orta Dəhliz iki böyük regionu birləşdirən vacib bir kanala çevriləcək. Söhbət təkcə nəqliyyat və enerji marşrutlarının inkişafından deyil, həm də iqtisadi imkanların genişləndirilməsindən gedir”, - deyə Özbəkistan Prezidentinin xüsusi nümayəndəsi vurğulayıb.

O, əlavə edib ki, bu cür layihələrin həyata keçirilməsi iqtisadi əməkdaşlığı təşviq etməklə yanaşı, ölkələr arasında mədəni və humanitar əlaqələri də gücləndirəcək.

“Bir çox iştirakçı qeyd edib ki, söhbət yalnız iqtisadi ölçüdən getmir. Bu cür təşəbbüslər xalqlarımız arasında mədəni və humanitar əlaqələrin inkişafı üçün böyük əhəmiyyət kəsb edəcək”, - deyə Əbdüləziz Kamilov bildirib.