Niderland və Ukrayna müdafiə və pilotsuz uçuş aparatlarının istehsalı sahəsində əməkdaşlığı genişləndirmək barədə razılığa gəliblər.

Fact-info.az  xəbər verir ki, bununla bağlı qərar Kiyevdə keçirilən görüşdən sonra açıqlanıb.

Ukrayna prezidenti Volodimir Zelenski ilə ölkəyə səfər edən Niderlandın Baş naziri Rob Jetten arasında keçirilən danışıqlarda tərəflər müasir texnologiyaların döyüş meydanındakı həlledici rolunu vurğulayıblar. Bu barədə Ukrayna prezidentinin administrasiyasının yaydığı birgə bəyanatda bildirilib.

Qeyd olunub ki, tərəflər müdafiə sənayesi sahəsində əməkdaşlığı genişləndirmək niyyətlərini bir daha təsdiqləyiblər. Həmçinin bildirilib ki, hər iki ölkə Ukraynanın hava hücumundan müdafiə imkanlarının təcili olaraq daha da gücləndirilməsinin zəruriliyini vurğulayıb.

Tərəflər Ukraynada hərtərəfli, ədalətli və davamlı sülhün bərpası istiqamətində səylərin irəlilədilməsi üçün konkret addımlar da müəyyənləşdiriblər. Niderland bu prosesdə Kiyev üçün təhlükəsizlik zəmanətlərinin vacibliyini vurğulayıb.

Eyni zamanda, Niderland tərəfi yeni hökumətin Ukraynaya uzunmüddətli və genişmiqyaslı dəstəyini davam etdirəcəyini, o cümlədən siyasi yardım göstərəcəyini bir daha bəyan edib. Ukrayna isə Haaqanın “Prioritized Ukraine Requirements List” (PURL) proqramı çərçivəsində oynadığı rola görə dərin minnətdarlığını ifadə edib.

Birgə bəyanatda tərəflər, həmçinin Ukraynanın gələcəkdə Avropa İttifaqı və NATO-ya üzvlüyü ilə bağlı ortaq baxışlarını yenidən təsdiqləyiblər və ölkədə aparılan islahatlarda mühüm irəliləyişlərin əldə olunduğunu qeyd ediblər.