Dahi şəxsiyyət, yurdsevər, millət fədaisi, Azərbaycan Xalq Cümhuriyyətinin banilərindən olmuş Məhəmməd Əmin Rəsulzadənin bu gün vəfatının ildönümüdür. Böyük şəxsiyyəti ehtiramla, rəhmətlə anırıq.

 Yaddaşımızı təzələmək üçün  o böyük şəxsiyyətin ömür yoluna qısa nəzər salaq. Məhəmməd Əmin Rəsulzadə 1884-cü il yanvarın 31-də Bakının Novxanı kəndində anadan olub. Gənc yaşlarında sosial demokratlarla birgə “Hümmət” təşkilatının yaranmasında iştirak edib. Çarizmin təqiblərinə məruz qalaraq 1909-cu ildə İrana mühacirət edən Rəsulzadə bir müddət burada “İrane-nou” qəzetinin baş redaktoru kimi çalışıb, məşrutə inqilabı yatırıldıqdan sonra Türkiyəyə mühacirət edib.

Məhəmməd Əmin Rəsulzadə  öz silahdaşları ilə bərabər 1918-ci ilin mayın 28-də Azərbaycan Xalq Cümhuriyyətini qurub. Hər zaman düşünürük Xalq Cümhuriyyətində təmsil olunan insanların bu qədər millətsevər olması bizi vətəndaş olaraq qürurlandırır. Bu insanlarda nə qədər güclü fədakarlıq, sözün yaxşı mənasında bir millətçilik olub ki, mümkün olmayan bir şeyi həyata keçiriblər. Azərbaycan Xalq Cümhuriyyəti müstəqilliyə nail olmaqla, 114 min kv. km ərazini dünyaya tanıtmaqla müasir dövlətçiliyimizin əsasını qoyub.

 Bəlkə də həmin AXC qurulmasaydı Azərbaycan sonrakı dövrlərdə Rusiyanın hansısa muxtar vilayəti kimi qala bilərdi. Xalq Cümhuriyyətinin liderləri siyasi idarəetmə sisteminə, ümumilikdə o dövrün siyasətinə əxlaqi dəyərlər gətirdilər. O zaman dünyada o cümlədən Avropada tam oturuşmayan demokratik seçki sistemini, idarəetmə ənənələrini, Azərbaycanda tətbiq etməyə cəhd göstərdilər. Azərbaycan dövlətinin yaranması, inkişafı uğrunda mücadilə aparan bu insanlar bu istəklərinə müəyyən mənada nail oldular. Məhəmməd Əmin Rəsulzadə 1955-ci il martın 6-da Ankarada vəfat edib.

Əkrəm Bəydəmirli