Xocalı faciəsindən 34 il keçir. XX əsrin sonunda baş vermiş bu faciə təkcə Azərbaycan xalqına deyil, bütün insanlığa, bəşəriyyətə qarşı yönəlmiş ən ağır cinayətlərdən biridir. Xocalı soyqırımı nəticəsində 8 ailə tamamilə məhv edilmiş, 130 uşaq bir valideynini, 25 uşaq isə hər iki valideynini itirmiş, habelə 68-i qadın, 26-sı uşaq olmaqla 1275 nəfər girov götürülmüş, ağır müharibə cinayətləri törədilmişdir. Soyqırımı cinayətinin əlamətlərini özündə ehtiva edən bu ağır cinayət əməli bəşər tarixinin ən faciəvi səhifələrindən biridir.

 44 günlük  Vətən müharibəsində qəhrəman əsgərlərimizin hər zaman yanında olan, onların sağlamlığının keşiyində duran, onlarla yaralını həyata qaytaran insanlardan biri, tanınmış cərrah həkim Anar Yusibov Xocalı faciəsi ilə bağlı fikirlərini açıqlayıb:

 -O hadisələr vaxtı mən uşaq idim. Kəlbəcərdə yaşayırdıq, orta məktəbdə təhsil alırdım. Bir səhər gözümüzü açanda Xocalı ilə bağlı dəhşətli xəbərlər eşitdik. Xocalı şəhərində dinc əhaliyə qarşı kütləvi qətliam törətdilmişdi. Uşaqlar, qadınlar və qocalar amansızcasına qətlə yetirilmişdi. Bu soyqırım təkcə Azərbaycan xalqına deyil, bütün bəşəriyyətə qarşı törədilmiş bir cinayət idi. Dinc əhaliyə qarşı dünyada görünməmiş vəhşiliklər törədildi. Çoxda uzaq olmayan tarixdə törədilmiş bu soyqırımı sözlə ifadə etmək çətindir.

Sonra bizim məcburi köçkünlük dövrümüz başladı. Bütün çətinliklərə baxmayaraq, biz xalq olaraq bu dəhşətləri unutmadıq və heç zaman unutmayacayıq. İxtisasca həkim olan Xocalı qatillərindən biri Zori Balayan  sonralar yazdığı kitabda dinc incanlara qarşı törətdikləri bu qətllərdən zövq aldığını qeyd edir. Belə ağır cinayətlər törədən bir toplum nəhayət ki, cəzasız qalmadı.  

II Qarabağ müharibəsindən sonra torpaqlarımızı azad etdik. Düşməndən qisasımızı aldıq. Bu gün digər ərazilərimiz kimi, Xocalı da azaddır. Orada dinc quruculuq işləri davam edir, xocalılar öz evlərinə qayıdırlar. Xocalı qatillərinin bəziləri məhkəmə qarşısına çıxarılaraq cəzalarını aıdılar. Əminik ki, bütün cinayətkarlar gec-tez hüquq qarşısında  cavab verəcəklər. Amma biz bu, faciəni, erməni faşizmini unutmadıq və heç zaman unutmayacayıq. Övladlarımızı, gələcək nəsilləri elə yetişdirməliyik, hazırlamalıyıq ki, onlar dostlarını, düşmənlərini hər zaman tanısınlar, insanlıq əleyhinə olan erməni vəhşiliyi bir daha təkrar olunmasın. Şəhidlərimizə Allah rəhmət eləsin, onları ehtiramla, rəhmətlə anırıq! 

Fact-info.az