Ermənistan Konstitusiyasının qüvvədə olan redaksiyasının preambulasında istinad edilən Ermənistanın müstəqillik bəyannaməsi beynəlxalq razılaşmaların, o cümlədən Brest-Litovsk sülh müqaviləsinin şərtlərinə ziddir. Fact-info.az xəbər verir ki, bu barədə Türkiyənin bir sıra ölkələrdəki keçmiş səfiri Numan Xəzər Ankarada “Brest-Litovsk müqaviləsi və onun Türkiyə ilə Sovet İttifaqı, daha sonra isə Ermənistan arasında münasibətlərə təsiri” mövzusunda keçirilən konfransda çıxışı zamanı bildirib.

Ankaradakı Avrasiya Araşdırmaları Mərkəzinin (AVİM) təşkil etdiyi konfrans iştirakçılarına müraciət edən təqaüddə olan diplomat xatırladıb ki, Osmanlı imperiyası 1918-ci il martın 3-də sovet Rusiyası ilə müqavilə imzalayan dövlətlər sırasında olub.

O, Brest-Litovsk sülh müqaviləsini Birinci Dünya müharibəsi dövründə Osmanlı dövləti üçün “böyük diplomatik qələbə” adlandırıb.

“Bu sənədə əsasən, sovet hakimiyyəti 1878-ci ildə Rusiyanın nəzarətinə keçmiş Qars, Ərdəhan və Batumu Osmanlı dövlətinə qaytarmağı öhdəsinə götürmüşdü. Brest-Litovsk sülhü üzrə danışıqlar zamanı Osmanlı nümayəndə heyəti digər materiallarla yanaşı, Şərqi Anadoluda ermənilərin törətdiyi qanlı cinayətlər barədə məlumatları da sovet nümayəndələrinə təqdim edib”, - deyə N.Xəzər qeyd edib.

O, “Qərbi Ermənistan” iddialarını Türkiyə-Ermənistan münasibətlərinin perspektivləri üçün açıq təhdid adlandırıb.

Diplomat vurğulayıb ki, Türkiyənin Cənubi Qafqaz bölgəsindəki sərhədləri 1921-ci ildə Brest-Litovsk sülhünün şərtlərinin qismən tanınması olan Moskva müqaviləsinə uyğun olaraq tamamilə formalaşıb. “Qars və Ərdəhan Türkiyənin tərkibində tanınıb, Batum isə SSRİ-nin tərkibinə daxil edilib”, - deyə keçmiş səfir vurğulayıb.