- Nazir həkim, mümkünsə fəaliyyətiniz barədə oxuculara məlumat verərdiz.

- Mən, 2005-ci ildə ATU-nu bitirən kimi Azərbaycan Respublikası Silahlı Qüvvələrinin tabeçiliyindəki Mərkəzi Klinik Hospitalında, daha sonra isə Müdafiə Nazirliyinin Tibb İdarəsində həkim - radioloq və məhkəmə -tibb eksperti vəzifələrində çalışmışam. 2018-ci ildə Müdafiə Nazirliyi Rəhbərliyinin göstərişi ilə və biliklərimi artırmaq üçün Gülhanə Əsgəri Tibb Akademiyasında təhsil almağa başladım. 2020-ci ilin əvvəllərində, COVİD-19-un tüğyan etdiyi zaman mən Gülhanədə ixtisasımı artırırdım. 2020-ci ilin sentyabr ayının 27-də  Vətən savaşı başlandı. Mənimlə birgə Türkiyədə təhsil alan və işləyən həkimlər, həmçininə, tibb bacıları təcili surətdə Azərbaycana qayıtmaq və savaş meydanlarına atılmaq barədə birgə qərar verdik. Akademiyanın Rəhbərliyi bu arzumuzu təqdir etdi və aidiyyəti orqanlarla danışıqlar apardı. Sənədləşmə prosesi xeyli vaxt aparacaqdı. Biz, razılaşmaya əsasən Azərbaycana qayıtdıq. Mən ən qaynar nöqtələrdən olan Tərtər - Ağdərə bölgəsinə ezam edildim. Həm USM mütəxəssisi, həkim -radioloq, həm də məhkəmə - tibb eksperti olaraq fəaliyyət göstərirdim. Olduqca çətin günlər idi: hər gün onlarla yaralı və ya şəhidi qəbul etmək, onların müayinəsini və idenfikasiyasını təşkil etmək...

- Doktor, Vətən savaşı zamanı Tərtər bölgəsinə 44 mindən çox raket mərmisi düşmüşdü. Siz, Tərtər - Ağdərə bölgələrində dəfələrlə ölümlə üzbəüz gəlmisiz. Mümkünsə, bu barədə bir neçə kəlmə qeyd edərdiniz?

- Dəyərli Şamil müəllim, 2020-ci il sentyabrın 27-də başlanan və 44 gün davam edən savaşda Dövlət - Ordu və Xalqımızın birliyi sayəsində tarixi qələbə qazandıq. Siz düzgün qeyd etdiniz, həqiqətən də 44 günlük savaş zamanı Ermənistan Silahlı Qüvvələri Tərtər bölgəsinə 44 mindən çox mərmi atmışdılar. Xeyli yaralanan və ölən vardı. Biz, həm ön xətdən yaralıları, həm də şəhidlərin meyidlərini çıxarırdıq. Hər an ölüm təhlükəsi vardı. Üstəlik biz, savaş gedən ərazidə 44 gün deyil, 56 gün qaldıq və fəaliyyət göstərdik.

- Doktor, savaş meydanlarında sevincli və kədərli hadisələr çox olub. Mümkünsə qarşılaşdığınız maraqlı hadisələrdən biri haqqında məlumat verərdiniz?

- Hospitala yenicə şəhid olmuş 1 hərbi qulluqçunun meyidini gətirmişdilər. Meyidi 2 zabit yoldaşı gətirmişdi. Hiss olunurdu ki, şəhid olan onların dostu imiş. Hər ikisinin bənizi ağarmışdı.Biz, təklif etdik ki, əyləşsinlər. Lakin ayaq üstə var - gəl edirdilər. Hospitalda xəstələrə təmənnasız xidmət edən 1 el ağsaqqalı vardı.O, hər iki zabitin saçlarını sığalladı, onların əyləşmələrinə şərait yaratdı.Belə ki hər iki zabitin çəkmələrinin bağını açdı, ayaqqabıları çıxardı. Hər iki zabit bu mənzərəni sakitcə seyr edirdi. Yəni, cavab qaytarmadılar.

- Nazir həkim, Siz hazırda "Kraton" və "Oksigen" Klinikalarında işləyirsiz. Pasiyentlər ən çox hansı əlamətlərə görə sizə müraciət edirlər?

- Şamil müəllim, səbəblər müxtəlifdir. Biz komanda şəklində fəaliyyət göstəririk. Çalışırıq ki, qalib ölkənin əhalisinə nümunəvi xidmət göstərək.

- Nazir həkim, el arasında söhbət gəzir ki, KT müayinəsi həm də zərərlidir. Bu barədə nə deyə bilərsiz?

- Elədir ki var, Əslində KT müayinəsi həkimin məsləhəti əsasında olmalıdır. Bir insan bir il ərzində 1 dəfə bu müayinəni həkimin göstərişi əsasında etdirə bilər. Halbuki, COVİD - 19 zamanı Azərbaycanda KT müayinəsinə daha çox üstünlük verilirdi.

- Dəyərli Nazir həkim, maraqlı müsahibəyə görə sizə təşəkkür edirəm.

- Mən də sizə təşəkkür edirəm.

Şamil Sabiroğlu, jurnalist.

18.01.2026.