Elmin və texnologiyanın inkişafı ilə əlaqədar olaraq dünyada yeni anlayışlar və sözlər meydana çıxır. Bu anlayış və sözlərdən vaxtında xəbərdar olmaq və onları dilə gətirmək, heç şübhəsiz, vacibdir. Lakin bir şərtlə ki, yeni sözlərin dilə gətirilməsində ana dilinin qayda-qanunlarına əməl edilsin. Alınma sözlərlə dilin saflığı arasında tarazlığın qorunması məhz ana dilinə məxsus təməl qanunauyğunluqların ciddi şəkildə nəzərə alınmasından asılıdır. Xalq ruhunun daşıyıcısı və milli mənsubiyyətin əsas göstəricilərindən biri olan ana dilini qorumaqla biz milli ruhlu Azərbaycan vətəndaşının yetişməsinə, onun şəxsiyyətinin sağlam istiqamətdə formalaşmasına möhkəm zəmin yaradırıq.

Bunu AZƏRTAC-a açıqlamasında akademik, Azərbaycan Dillər Universitetinin Azərbaycan ədəbiyyatı kafedrasının müdiri Muxtar İmanov deyib.

Akademik bildirib ki, qloballaşma dövründə dilimizin üzləşdiyi ən böyük təhlükə kənar dillərin təsiri altına düşməsi və bu təsirin nəticəsində dilimizin fonetik, leksik, morfoloji, hətta sintaktik aşınmalara məruz qalmasıdır. Onun sözlərinə görə, dildə yersiz işlədilən əcnəbi sözlərin - dilçilikdə varvarizm adlanan leksik vahidlərin istifadəsi yolverilməzdir. Həmçinin kənar dillərin təsiri bəzən sintaktik vahidlərdə də özünü göstərir. Feili sifət və feili sifət tərkiblərini bir kənara qoyaraq, rus dilinin təsiri ilə “hansı ki” bağlayıcı sözündən tez-tez istifadə edilməsi də belə mənfi hallardandır.

“Ədəbi dilimiz varvarizmlərdən, morfoloji və sintaktik zədələnmələrdən elə qorunmalıdır ki, bu dil dünyanın müxtəlif ölkələrində yaşayan soydaşlarımız, xüsusilə də 30–40 milyonluq Güney Azərbaycan türkləri üçün nümunəvi danışıq və yazı dili olsun”,-deyə akademik vurğulayıb.