Trans-Xəzər Beynəlxalq Nəqliyyat Marşrutu üzrə Azərbaycan-Qazaxıstan-Türkmənistan əməkdaşlığının real logistik gücə çevrilməsi mümkündürmü? Bu model uzunmüddətli və dayanıqlı tərəfdaşlıq yaradır, yoxsa hələlik daha çox siyasi razılaşmalar səviyyəsində qalır?

Fact-info.az xəbər verir ki,  nəqliyyat üzrə ekspert Rauf Ağamirzəyev AZƏRTAC-a açıqlamasında bildirib ki, Azərbaycan–Qazaxıstan–Türkmənistan arasında mövcud əməkdaşlıq real logistik gücə çevrilə bilər və çevrilməlidir. Onun sözlərinə görə, Xəzər dənizi üzərindən limanlar arasında Bakı ilə gündəlik əlaqə mövcuddur və bu bərə əlaqələri hələ ötən əsrin 60-cı illərindən fəaliyyət göstərir.

Ekspert qeyd edib ki, hər bir ölkənin bu marşrutda öz üstünlükləri var: “Məsələn: Bakı ilə Türkmənbaşı limanı arasında məsafə ən qısadır. Qazaxıstan istiqamətində isə hazırda iki liman fəaliyyət göstərir və üçüncü limanın tikintisi nəzərdə tutulur. Bu limanlar Orta Dəhliz üçün strateji əhəmiyyət daşıyır”.

Rauf Ağamirzəyevin sözlərinə görə, Qazaxıstan və Türkmənistan limanları 2014-cü ildən dəmir yolu əlaqəsi ilə birləşdirilib, avtomobil yolları üzrə də ciddi infrastruktur layihələri həyata keçirilir.

“Qaraboğazqol körfəzində körpünün tikintisi bu il tamamlanaraq istifadəyə verilib. Türkmənistandan Qazaxıstan sərhədinə və Qazaxıstandan Türkmənistan sərhədinə gedən avtomobil yollarının isə yaxın bir il ərzində tamamlanması planlaşdırılır. Beləliklə, limanlar həm avtomobil, həm də dəmir yolu ilə əlaqələndirilir ki, bu da yükdaşımaların şaxələndirilməsi üçün mühüm infrastruktur həllidir. Bu üç ölkə arasında əlaqələr nə qədər intensiv olarsa və bürokratik prosedurlar nə qədər sadələşdirilərsə, Şərq–Qərb dəhlizi üzrə daha böyük həcmdə yüklərin daşınması üçün möhkəm zəmin yaranar”, - deyə ekspert vurğulayıb.