Zamanın axarında bir il daha tarixə çevrilir. Təqvimlərin son vərəqləri çevrilərkən, xalqımızın yaddaşında əbədi həkk olunmuş iki əlamətdar tarix – Yeni il və 31 Dekabr Dünya Azərbaycanlılarının Həmrəylik Günü – bir daha milli birliyin, vətən sevgisinin və qürurun simvoluna çevrilir.

Bu əlamətdar günlərdə ehtiyatda olan polkovnik-leytenant Həsənov Mahir Babayar oğlu – ömrünü Vətənə sədaqətlə xidmətə həsr etmiş bir zabit – hal-hazırda hərbi xidmətini şərəflə davam etdirən oğlu Həsənov Hikmətin adından da çıxış edərək, Azərbaycan Respublikasının Prezidenti, Müzəffər Ordumuzun Ali Baş Komandanı cənab İlham Əliyevi və Azərbaycan Respublikasının Birinci vitse-prezidenti, xalqımızın əziz övladı xanım Mehriban Əliyevanı səmimi qəlbdən təbrik edir. Onlara möhkəm can sağlığı, ali məqsədlərində uğurlar və xalqımıza daim qürur bəxş edən fəaliyyətlərində müvəffəqiyyətlər arzulayır.

Bu təbrik sadəcə bir ailənin deyil, bütöv bir xalqın ürəyindən gələn təşəkkürün, minnətdarlığın və inamın ifadəsidir. Çünki bu torpaq uğrunda canından keçən şəhidlərin ruhu, qazilərin əzmi, əsgərlərin sədaqəti və xalqın birliyi – hamısı bir amalın, bir ideyanın ətrafında birləşir: Azad, güclü və əbədi Azərbaycan!

Həsənovlar ailəsi bu təbriklə həm də Azərbaycan Respublikasının bütün güc strukturlarında çalışan fədakar zabit və əsgərləri, şəhid ailələrini, qaziləri, müharibə iştirakçılarını və bütövlükdə Azərbaycan xalqını təbrik edir. Onların hər birinə sağlam can, ruhi möhkəmlik və yeni ildə yeni zəfərlər arzulayır.

Yeni il – sadəcə təqvim dəyişikliyi deyil, həm də yeni ümidlərin, yeni başlanğıcların, yeni zirvələrin müjdəsidir. Qoy 2026-cı il dövlətimizə bərəkət, xalqımıza rifah, ordumuza qüdrət, vətənimizə əmin-amanlıq gətirsin. Qoy bu il də bayrağımız daha uca zirvələrdə dalğalansın, birliyimiz daha da möhkəmlənsin, ruhumuz daha da yüksəlsin.

Çünki Vətən – yalnız torpaq deyil, o, babaların duası, anaların göz yaşı, övladların and yeridir. Vətən – qəlbdə yanan bir ocaqdır ki, onu qorumaq həm şərəf, həm də müqəddəs borcdur.

Qar altında donmuş torpağın sinəsində bahar toxumu necə gizlənirsə, xalqımızın ruhunda da daim ümid, dirçəliş və zəfər arzusu yatır.

Bu torpaq – şəhid qanı ilə sulanmış, dualarla qorunan, igidlərin sinəsi ilə sipər olunmuş müqəddəs Vətəndir. Və bu Vətənə sədaqət – Həsənovlar kimi ailələrin timsalında əbədiyyətə yazılmış bir anddır.

Dinləyib qələmə alan: 

Mövsümağa Ədalətoğlu

Yazıçı - publisist