Tbilisi şəhərində M.Fətəli Axundzadə adına Azərbaycan Mədəniyyət Mərkəzində Dünya Azərbaycanlılarının Həmrəyliyi Günü və dahi bəstəkar Üzeyir Hacıbəylinin anadan olmasının 140 illiyi münasibətilə klassik musiqi gecəsi təşkil olunub.

Muzeyin direktor müavini Leyla Əliyeva çıxış edərək tədbirin əhəmiyyətini qeyd edib.

Azərbaycanın Gürcüstandakı səfiri Faiq Quliyev çıxış edərək qonaqları Dünya Azərbaycanlılarının Həmrəyliyi Günü və Yeni il münasibətilə təbrik edib.

Səfir Azərbaycan ilə Gürcüstan arasında mövcud olan yüksəksəviyyəli dostluq və strateji tərəfdaşlıq münasibətlərindən bəhs edib, mədəni-humanitar sahədə əməkdaşlığın əhəmiyyətini vurğulayıb.

Diplomat 2025-ci ildə Azərbaycan dövlətinin qazandığı uğurlardan bəhs edib. 2026-cı ilin də ölkəmiz və xalqımız üçün uğurlu olmasını arzulayıb.

Daha sonra Azərbaycanın Əməkdar artisti Nərgiz Əliyeva çıxış edərək bu cür tədbirlərin milli-mədəni irsin təbliği və gənc istedadların tanıdılması baxımından mühüm rol oynadığını bildiriblər.

Musiqi gecəsi maraqlı konsert proqramı ilə davam edib.

Qara Qarayev adına Mərkəzi İncəsənət Məktəbinin Bülbül adına orta ixtisas musiqi məktəbinin və Bakı Musiqi Akademiyasının tələbələri Ü.Hacıbəylinin əsərlərindən parçalar ifa ediblər.

İstedadlı gənclərin təqdim etdiyi klassik musiqi nümunələri tamaşaçılar tərəfindən böyük maraq və alqışlarla qarşılanıb.

Tədbir mədəniyyətlərarası dialoqun və Azərbaycan musiqi irsinin Gürcüstanda təbliği baxımından əlamətdar hadisə kimi dəyərləndirilib.