Dinlədim... Qəlbimin dərinliklərinə enərək, bir xalqın fəxarətini, bir zabitin sədaqətini, bir atanın qürurunu, bir oğulun Vətən sevgisini dinlədim. Hər kəlmədə bir ömür vardı, hər cümlədə bir tarix, hər sətirdə bir millətin ruhu danışırdı.

Dekabrın 24-ü — təqvimdə sadə bir tarix kimi görünə bilər. Lakin bu gün Azərbaycan xalqı üçün sadə bir gün deyil. Bu gün, bir millətin taleyini dəyişən, onu zülmətdən nura çıxaran, qürurla “Mən azərbaycanlıyam!” deməyi xalqına sevincə çevirən bir Liderin — Möhtərəm Cənab Prezident, Ali Baş Komandan İlham Əliyevin doğum günüdür.

Mənalı illərini səngərlərdə, ön cəbhədə, Vətənin nəfəsini torpağın qoxusu ilə birləşdirərək keçirmiş ehtiyatda olan polkovnik-leytenant Həsənov Mahir Babayar oğlunun dilindən süzülən bu sözlər sadəcə bir təbrik deyil — bu, bir xalqın Liderinə ünvanladığı təşəkkür məktubudur. Bu məktubda yalnız bir zabitin deyil, həm də onun Vətənə xidmət edən oğlu — əsgər Həsənov Hikmət Mahir oğlunun da ürək döyüntüləri eşidilir.

Bu sətirlərdə bir həqiqət var: əgər bu gün Azərbaycan əsgəri səngərdə əmin-amanlıqla dayanırsa, xalq sabaha ümidlə baxırsa, bu, Cənab Prezidentimizin sarsılmaz iradəsi, müdrik siyasəti və xalqına olan sonsuz sevgisinin bəhrəsidir. O, yalnız Dövlət Başçısı deyil — o, həm də millətin ruhunu özündə daşıyan, tarixin axarını dəyişən bir Şəxsiyyətdir.

Onun rəhbərliyi ilə Azərbaycan yalnız torpaqlarını deyil, həm də milli ləyaqətini, tarixi ədaləti bərpa etdi. Bu gün “Bütöv Azərbaycan” deyə bilirik — çünki bu, artıq bir ideal yox, reallıqdır. Bu reallığın arxasında şəhidlərin müqəddəs qanı, qazilərin fədakarlığı və ən başlıcası, Liderimizin əyilməz iradəsi dayanır.

Cənab Prezidentin şəhid ailələrinə, qazilərə, hərbçilərə və onların ailələrinə göstərdiyi diqqət və qayğı, onun ali insani keyfiyyətlərinin, xalqına olan dərin məhəbbətinin təcəssümüdür. O, xalqın səsinə çevrilmiş iradədir, millətin qəlbində yaşayan Liderdir.

Bu əlamətdar gündə Möhtərəm Cənab Prezidentə sağlam can, tükənməz enerji, müdriklik və gələcək fəaliyyətində uğurlar arzulayırıq. Sizinlə fəxr edirik, Sizinlə güclüyük, Sizinlə Bütöv Azərbaycanıq, Cənab Prezident!

Dinləyib qələmə alan:
Mövsümağa Ədalətoğlu
Yazıçı - publisist