“İƏT Mədəniyyət Festivalı: Bakı Yaradıcı Həftə – 2025” çərçivəsində keçirilən tədbirlər ərəfəsində Azərbaycanın sandıq və mücrü sənətkarlığı nümunələri çoxsaylı ziyarətçilərə təqdim edildi. Sərgidə nümayiş olunan əsərlərin hər birinin öz tarixçəsi və mənası var. Hər bir nümunə keçmişin izlərini, xalqın yaddaşını, simvolik düşüncə qatlarını və fərdi yaradıcılığın müəllif imzasını özündə ehtiva edir.

Bunu Fact-info.az-a açıqlamasında Tətbiqi Sənət Nümunələrinin Qorunmasına və Təbliğinə Yardım İctimai Birliyinin sədri, Azərbaycan Rəssamlar İttifaqının üzvü Lalə Sərdarlı deyib.

O, təqdim olunan əsərlərin düşüncə oyadan, hekayə yaradan, mesaj ötürən, kodlar və simvollar daşıyan çoxqatlı məna sisteminə əsaslandığını bildirib: “Tətbiq olunan beyin mərkəzli yaradıcılıq metodologiyası sənət əsərinin yaradılmasında yalnız estetikaya deyil, insan beyninin düşüncə modeli, yaddaş mexanizmləri və dərin mənanı qavrama xüsusiyyətlərinə əsaslanan xüsusi yaradıcılıq yanaşmasına söykənir. Məqsədimiz təkcə sandıq və mücrü sənətini yaşatmaq deyil, həm də funksionallığını itirmiş qədim məişət əşyalarına və unudulmuş sənətkarlıq nümunələrinə yeni nəfəs verərək, dövrümüzə qaytarmaqdır. Bu, həm milli irsin qorunmasına, həm də onun müasir bədii dillə yenidən təqdim olunmasına xidmət edir”.

Lalə Sərdarlı əlavə edib ki, bu cür mühüm yaradıcılıq tədbirlərində belə əsərlərin nümayişi Azərbaycan mədəniyyətinin zənginliyini dünya ictimaiyyətinə çatdırmaq baxımından xüsusi əhəmiyyət daşıyır. Onun sözlərinə görə, hər bir təqdimat həm sənət irsimizin tanıdılmasına, həm də yaradıcı yanaşmaların beynəlxalq səviyyədə dəyərləndirilməsinə imkan yaradır.