Əvvəllər Qobustan rayonunun Cəmcəmli kənd sakinləri bəzi problemlərlə üzləşirdilər. Kənddə suyun qıtlığı, yanacağın olmaması, eləcə də rayon mərkəzinə qədər olan yolun bərbadlığı və s. xeyli çətinlik yaradırdı. Hətta məktəbin binası da köhnə tikilidən ibarət idi. Artıq bu problemlər son dövrdə öz həllini tapıb. Kənd sakinlərinə məxsus təsərrüfatlar da genişləndirilib.

Hal-hazırda kənddə 274 təsərrüfat olmaqla 1515 nəfər yaşayır. Kənd əhalisi əsasən əkinçilik və heyvandarlıqla məşğuldur. Kənd 1650 hektar əkinə yararlı torpaq sahəsinə malikdir. 2662 hektar otlaq sahəsi vardır ki, burada sakinlərə məxsus 610 baş iribuynuzlu heyvan və 5870 baş xırdabuynuzlu heyvan qidalanır. 3 toxumçu təsərrüfatı fəaliyyət göstərir ki, burada onlarla kənd sakini işləyir.

Cəmcəmli kənd sakinləri artıq öz xoş günlərini yaşayırlar. Son dövrdə 180 yerlik ikimərtəbəli məktəb binası inşa edilərək, şagird və müəllim kollektivinin ixtiyarına verilmişdir. Özü də müasir avadanlıqlarla təmin edilmişdir. Kəndə fasiləsiz axını olan su xətti çəkilmiş, rayon mərkəzinə olan 8 km-lik yol keyfiyyətli şəkildə asfaltanmışdır. Bütün evlərdə mavi qaz sobalarda şölələnir.

Tibb məntəqəsi də sakinlərə xidmət göstərir. Yeni internet xətti də çəkilmişdir. Artıq kənddaxili yolun 2650 metri asfatlanmışdır. Kənddaxili yolun qalan 1700 metri növbəti mərhələdə asfatlanacaqdır. Kəndarası yolun kənarlarına 1000 ədəd eldar şamı və 2000 ədəd müxtəlif növ ağaclar əkilmişdir. Ağacəkmə kampaniyası indi də davam etməkdədir. Kənddə mövcud problemlərin tam şəkildə həll olunmasında Qobustan Rayon İcra Hakimiyyətinin yaxından köməkliyi əvəzolunmazdır.

Dövlət başçımızın iri şəhərlərlə yanaşı kəndlərə də göstərdiyi qayğını və diqqəti biz, cəmcəmlilər daima hiss etimişik. Məhz bunun nəticəsidir ki, Cəmcəmli kəndində olan sakinlərin rahat yaşaması üçün zəruri problemlər vaxtında və tam şəkildə öz həllini tapmışdır. Göstərilən bu qayğıya görə hörmətli Prezidentimiz İlham Əliyevə biz, cəmcəmlilər öz təşəkkürümüzü və minnətdarlığımızı bildiririk. 

Məhəmməd Bayramov

Rayon Ağsaqqalar Şurasının Cəmcəmli kəndi üzrə nümayəndəsi