Azərbaycanın milli klassik musiqisinin və professional bəstəkarlıq məktəbinin banisi, ilk milli operanın müəllifi, görkəmli maarifçi, dramaturq və publisist Üzeyir bəy Hacıbəylinin anadan olmasının 140 illiyi münasibətilə silsilə nəşrlər çap edilib. Fact-info.az xəbər verir ki, yubiley çərçivəsində bp şirkətinin sponsorluğu ilə üç kitab işıq üzü görüb.

Nəfis tərtibatda nəşr olunmuş "Ömür albomu" Üzeyir bəyin həyat və yaradıcılığını, ictimai fəaliyyətini və musiqi irsi haqqındadır. Kitabdakı fotoşəkillər, sənədlər, illüstrasiyalar, afişalar dahi bəstəkarın ömür yolunun müxtəlif mərhələlərini, ailə üzvlərini, dostlarını, pedaqoji və publisistik fəaliyyətini, Azərbaycan musiqisinin inkişafına verdiyi əvəzsiz töhfələri əks etdirir.

Nəşrin layihə rəhbəri və ideya müəllifi Üzeyir Hacıbəylinin ev-muzeyinin direktoru, Xalq artisti Sərdar Fərəcov, tərtibçiləri isə muzeyin əməkdaşları Nərgiz Qədirova və Xanım Həsənxanovadır. Kitabın redaktoru Azərbaycan Yazıçılar Birliyinin Gənclər Şurasının sədri Fərid Hüseyndir.

"Unudulmaz incilər" (partituralar) adlanan digər bir nəşrə "Milli marş", "Şeyx Sənan" operasından üç fraqment ("Müqəddimə", "Qızların xoru", "Şeyx Sənanın eşq etirafı"), "Çırpınırdın, Qara dəniz", "Simfonik rəqslər №1", "Simfonik rəqslər №2", "Bahar nəğməsi", "Aşıqsayağı" əsərləri daxildir. Kitaba yazılan “Ön söz”də qeyd edildiyi kimi, bəstəkarın arxivində hələ də opera, kantata, mahnı və digər janrlarda yazılmış əsərlər öz tədqiqatçılarını gözləyir. Nəşrin redaktoru Sərdar Fərəcov, məsul redaktoru Fərid Hüseyn, ingilis dilinə tərcümə edən Tamam Bayatlıdır.

"Uşaqlara hədiyyə (səs və fortepiano üçün mahnılar)"də görkəmli bəstəkarın yaratdığı möhtəşəm operalar, operettalar, kantatalar, kamera və orkestr əsərləri ilə yanaşı, uşaqların mənəvi aləmini zənginləşdirən çox gözəl, oynaq və mənalı mahnılar verilib. Gənc bəstəkar Vəfa Bağırzadənin tərtib etdiyi məcmuədə 8 mahnı - "Çıxdı günəş", "Ninni", "Pilotlar", "Səhər-səhər yaz çağı", "Beşik başında", "Bir quş düşdü havadan", "Bayram günü", "Şəfəq sökülərkən" mahnıları yer alıb.

Həmin nəşrin də redaktoru Üzeyir Hacıbəylinin ev-muzeyinin direktoru, Xalq artisti Sərdar Fərəcov, məsul redaktoru Azərbaycan Yazıçılar Birliyinin Gənclər Şurasının sədri, şair Fərid Hüseyn, ingilis dilinə tərcümə edəni Tamam Bayatlıdır.