Azərbaycanın Mərkəzi Asiya formatına daxil edilməsi strateji baxımdan əsaslandırılmış qərardır.

Fact-info.az xəbər verir ki, bunu AZƏRTAC-ın “Azərbaycan və dünya” proqramının növbəti buraxılışında Özbəkistan Prezidenti yanında Strateji və Regionlararası Araşdırmalar İnstitutunun şöbə müdiri Milana Bazarova deyib. Onun sözlərinə görə, bu format hər iki regionun xalqlarının maraqlarına cavab verir və mühüm infrastruktur, enerji və iqtisadi imkanlar açır, həmçinin strateji etimad səviyyəsini artırır.

Perspektivlərdən danışarkən o, ölkələrin qarşısında dayanan vəzifələri qeyd edib: vahid nəqliyyat-logistika sisteminin formalaşdırılması, əlaqələndirilmiş investisiya bazarının inkişafı, energetik qarşılıqlı əlaqəlilik, texnoloji və sənaye əməkdaşlığı imkanları, həmçinin gənclər siyasəti və təhsil sahələri də daxil olmaqla mədəni-humanitar qarşılıqlı fəaliyyətin aktivləşdirilməsi.

M. Bazarova Xəzərdən Mərkəzi Asiyaya qədər uzanan nəqliyyat-logistika və investisiya zonasının genişləndirilməsi məsələsi üzərində ayrıca dayanıb. Onun sözlərinə görə, Azərbaycan yük axınının əhəmiyyətli hissəsinin keçdiyi Trans-Xəzər Beynəlxalq Nəqliyyat Marşrutu (Orta Dəhliz) üzrə əsas ölkədir. Son beş ildə tranzit həcmi üç dəfə artıb və Ələt limanının buraxılış qabiliyyəti 15 milyon tona çatıb. O qeyd edib ki, bu, imkanların hələ son həddi deyil. Ekspertin fikrincə, Azərbaycanın Mərkəzi Asiya formatına daxil edilməsi Orta Dəhlizin effektivliyini və rəqabətqabiliyyətliliyini əhəmiyyətli dərəcədə möhkəmləndirir.