Rəqəmsallaşma dəmir yollarında hərəkətin tənzimlənməsində, yüklərin izlənərək nəzarətdə saxlanılmasında mühüm rol oynayır. Bununla yanaşı, sərhədlərdən keçərkən sənədləşmə işi asan və tez başa gəlir.

Bu fikirləri Qazaxıstanın “KTZ Express” Səhmdar Cəmiyyətinin layihələr və marketinq üzrə direktoru Asem Muhamediyeva deyib. O bildirib ki, Trans-Xəzər Beynəlxalq Nəqliyyat Marşrutunun rəqəmsallaşması zəruridir. Rəqəmsallaşma marşrutla yükdaşımaların həcmini artırmaqla yanaşı, onun inkişafına da təsir göstərər.

“Son 5 il ərzində Qazaxıstan ərazisindən tranzit yükdaşımaları 5 dəfə artaraq 1,4 TEU-ya çatıb. Xüsusi artım Trans-Xəzər marşrutu ilə daşınan yüklərdə müşahidə olunur. Çindən yükdaşıma 33 dəfə artıb”, - deyə o əlavə edib. A.Muhamediyeva bildirib ki, Cəmiyyətin rəqəmsal sistem tətbiq etməsi nəticəsində 2025-ci ilin ötən dövrü ərzində 1 200 şirkət yüklərin daşınması üçün müraciət edib. Yükləri daşımaq üçün sifarişlərin artması iş həcmini də artırır və buna görə də rəqəmsal sistemin tətbiqi artıq zərurətə çevrilib.

“Trans-Xəzər marşrutu həm də onunla səmərəlidir ki, Çindən Avropaya daşınan yüklər artıq 35-40 günə deyil, 25 günə mənzil başına çatdırılır. Ötən il Qazaxıstan Çinin Sian limanında terminal inşa edərək istismara verdi ki, bunun da nəticəsində Trans-Xəzər marşrutu ilə Çindən Avropaya konteyner daşımaları mütəmadi hal alıb”, - deyən “KTZ Express”in nümayəndəsi nəzərə çatdırıb ki, Qazaxıstanın Xəzər dənizi sahilindəki Aktau limanı yükləri qəbul edib Cənubi Qafqaza və Avropaya yola salır.

“Trans-əfqan nəqliyyat dəhlizi tam formalaşdıqdan sonra Qazaxıstanın, Cənubi Qafqazın və Avropanın Hindistanla nəqliyyat əlaqəsi daha da genişlənəcək ki, bu da Trans-Xəzər Beynəlxalq Nəqliyyat Marşrutunun strateji əhəmiyyətini artıracaq”, - deyə müsahibimiz vurğulayıb.