Dövlət qurumlarının rəqəmsal xidmətlərini birləşdirən “MyGov” platforması “SİMA İmza”da inteqrasiya olunub. “SİMA İmza” ilə vətəndaşlar “MyGov” inteqrasiyasının istənilən xidmətindən istifadə edə bilərlər.

Bu sözləri AZƏRTAC-a məxsusi açıqlamasında “AzInTelecom”un Kommersiya departamentinin direktoru Fərrux Fərəcullayev deyib.

“Özəllərə gəlsək, banklar, sığorta şirkətləri, bank olmayan kredit təşkilatları və ümumilikdə, maliyyə sektoru nəzərdə tutulur. Məsələn, kredit kartının sifarişi, bank hesabının açılması kimi məsələlərlə bağlı qaydalarda dəyişiklik edilib. Videoqeydiyyat ilə onlayn hesab açmağa icazə verildi və onun əsasında biz “SİMA Videozəng” və “SİMA Videoqeydiyyat” məhsullarını yaratdıq ki, bu prosesi sürətləndirsin”, - deyə departament direktoru əlavə edib.

Fərrux Fərəcullayev "Remote online" hesabaçma qaydasının olduğunu da diqqətə çatdırıb: "Onun üzərindən bir qrup vətəndaşa banklar ortalama olaraq 200 kart verə bilirdi. İndi hazırda bir günə 7-10 min kart verilir. Bu, əlçatanlığı qat-qat artırdı və rəqəmsallaşmaya imkan verdi". O əlavə edib ki, “AzInTelecom” biznes sektorunun inkişafı üçün sahibkarlara da dəstək verir. "Sahibkarlar heç yerə getmədən sadəcə VÖEN-i daxil edərək, SİMA-nın mobil tətbiqində sertifikat əldə edirlər. Onlar bütün vergi işlərini və digər sahibkarlıq subyektlərinə aid elektron xidmətləri SİMA-da imzası ilə həll edə bilərlər. Hazırda 6 ay ödənişsiz kampaniya aparılır. Bu çərçivədə bütün sahibkarlar xidmətlərdən promokodu daxil etdiyi müddətdən etibarən 6 ay ərzində tam pulsuz istifadə edə bilərlər", - deyə Fərrux Fərəcullayev bildirib.