Dövlətlərin və xalqların inkişaf tarixinə nəzər yetirdiyimiz zaman lider amilinin bu inkişafda əsas rol oynadığı məlum olur. Ukrayna məsələsi fonunda bu amil daha aydın görünür. Beynəlxalq təhlükəsizliyin qarantı qismində özünü göstərən aktorların soyuq yanaşmasının və ikili standartları tətbiq etməsinin nəticəsidir ki, haqqında bəh-bəhlə bəhs edilən demokratik dəyərlər yerlə-bir olub. Məhz bu reallıqları zamanında görən Prezident İlham Əliyev Azərbaycanı güclü etmək yolunda qətiyyətli addımlar atdı. Çünki güclü olmadan heç nəyə nail ola bilməyəcəyimiz son dərəcə aydın idi.

Fact-info.az  xəbər ki, bunu AZƏRTAC-a açıqlamasında Milli Məclisin deputatı Aydın Hüseynov bildirib.

O qeyd edib ki, 30 illik işğal dövründə gördüyümüz sadəcə dişsiz-ünvansız bəyanatlar, işğalçı ilə işğala məruz qalan dövlət arasında fərq qoyulmadan verilən açıqlamalar idi: “Bir daha əmin olduq ki, dünya siyasəti qətiyyətli lider boşluğunda daha da itir-batır. Azərbaycan Lideri isə istər Ermənistanın, istərsə də ona havadarlıq edən qüvvələrin bütün məkirli planlarını, çirkli oyunlarını tərsinə çevirdi. Biz dünyaya sübut etdik ki, beynəlxalq hüquq işləməsə də, heç kim bizə qulaq vermək istəməsə də biz öz reallığımızı özümüz yarada bilərik. Belə də oldu. Həm müharibədə Zəfər əldə etdik, həm ərazi bütövlüyü və suverenliyimizi bərpa etdik, hətta əldə etdiyimiz tarixi Zəfəri dünyaya da qəbul etdirdik. Vaxt var idi Azərbaycana qarşı ən barışmaz mövqedə dayanan aktorlar bu gün bölgədə heç bir layihənin, heç bir reallığın Azərbaycansız qəbul edilə bilməyəcəyini dərk edirlər, bununla barışır, uzlaşırlar. Məhz bu reallıqları yaradan dərin siyasi biliyi, uzaqgörən diplomatiyası ilə seçilən Liderimiz İlham Əliyevdir. Dövlət başçımız heç bir mübaliğəsiz mümkünsüzü mümkün etməyi bacardı”.

Aydın Hüseynov bildirib ki, Azərbaycan diplomatiyasının əks-sədası regionumuzu, sərhədləri aşır. Azərbaycan Lideri sadəcə Ermənistanın deyil, ona havadarlıq edən qüvvələrin də üzərində Zəfər əldə etdi. Dövlət başçımız regionla bağlı ucuz, dağıdıcı planlar quran aktorları həmin dövrün status kvosunu rəsmiləşdirmək imkanlarından məhrum etdi.

“Azəbaycan Prezidenti bu yolda xalqına inandı, güvəndi. Məhz güclü dövlət-xalq-ordu birliyi nəticəsində biz bunlara nail ola bildik. Bu gün yeni reallıqlar üzərindən hərəkət edirik. Bu reallıqlarda regionumuza doğru istiqamətlənən istənilən dağıdıcı oxları geri çeviririk. Bunu bacaran isə həm Lider kimi öz adını, həm də xalqının və dövlətinin adını yeni dünya tarixinə qızıl hərflərlə yazmağı bacaran İlham Əliyevdir”, - deyə o vurğulayıb.