Azərbaycanın Mərkəzi Asiya dövlət başçılarının məsləhətləşmə görüşləri formatına qoşulması mühüm strateji əhəmiyyət kəsb edir.

Bunu AZƏRTAC-ın “Azərbaycan və dünya” proqramının növbəti buraxılışında qırğız politoloq və iqtisadçı İsgəndər Şarşeyev bildirib.

Onun sözlərinə görə, region ölkələri ortaq tarix, dil və mədəniyyətlə sıx şəkildə bağlıdır ki, bu da əməkdaşlığın daha da dərinləşdirilməsini asanlaşdırır. “Qlobal geosiyasətin dəyişdiyi, dəniz yollarında problemlərin artdığı və quru marşrutlara tələbatın yüksəldiyi bir şəraitdə yenidən canlanan İpək Yolunun əhəmiyyəti sürətlə artır. Çindən Avropaya uzanan, formalaşmaqda olan nəqliyyat dəhlizi bu gün yenidən dünya logistikasının əsas istiqamətlərindən birinə çevrilir”, – deyə ekspert vurğulayıb.

İ. Şarşeyev, həmçinin qeyd edib ki, bu prosesdə Azərbaycanın rolu son dərəcə vacibdir. Əsas Trans-Xəzər marşrutu məhz onun ərazisindən keçir və bu, Mərkəzi Asiya ölkələrinə Avropa bazarlarına çıxış imkanı yaradır, ticarətin inkişafına, ərzaq və iqtisadi təhlükəsizliyin möhkəmlənməsinə xidmət edir, eləcə də nəqliyyat istiqamətlərinin məhdud sayından asılılığı azaldır.

Onun fikrincə, görüşlərin formatının “altılıq” səviyyəsinə qədər genişlənməsi regionun təsir imkanlarını artırır və təhlükəsizlik sahəsində koordinasiyadan tutmuş vahid ticarət məkanının formalaşmasına qədər daha dərin inteqrasiyaya gətirib çıxara bilər.

Uzunmüddətli perspektivdə isə o, hesab edir ki, Avropa İttifaqı prinsipinə bənzər, regionlararası birliyin yaranması mümkündür ki, burada da Azərbaycan Mərkəzi Asiya ilə Cənubi Qafqaz arasında əlaqələndirici halqaya çevriləcək.