Diasporla İş üzrə Dövlət Komitəsinin nəzdində fəaliyyət göstərən Diasporlara Dəstək Fondunun dəstəyi və Avstriya Azərbaycanlıları Cəmiyyətinin təşkilatçılığı ilə bu gün Zalsburq şəhərində fəaliyyət göstərən Zalsburq Azərbaycan Evində möhtəşəm konsert proqramı təqdim olunub. Fact-info.az xəbər verir ki, Azərbaycan musiqi mədəniyyətinin, milli birliyimizin və Zəfər ruhunun təntənəsinə çevrilən bu tədbir “44 günün nəğməsi” adlanıb.

Tədbirdə çıxış edən Avstriya Azərbaycanlıları Cəmiyyətinin sədri Fərid Əzizov bu günün mahiyyətindən, 44 günlük Vətən müharibəsində qazanılmış tarixi Qələbənin mənəvi və siyasi əhəmiyyətindən, eləcə də tədbirin məqsədindən danışıb.

İştirakçılar Vətən uğrunda mübarizədə canlarından keçən şəhidlərimizin əziz xatirəsini bir dəqiqəlik sükutla anıblar.

Sonra qeyd edilib ki, 44 günlük Vətən müharibəsi xalqımızın birliyinin, əzminin və yenilməz ruhunun parlaq təzahürüdür. Bu Zəfər təkcə hərbi Qələbə deyil, həm də milli kimliyimizin, mənəvi iradəmizin təntənəsidir.

Tədbirdə təkcə azərbaycanlı icma üzvləri deyil, Avstriya vətəndaşları, musiqisevərlər və diaspor nümayəndələri də iştirak ediblər.

Avstriya Azərbaycanlıları Cəmiyyətinin nümayəndəsi Həcər Bağcı qonaqlara Qarabağ müharibəsinin gedişi, Azərbaycanın qazandığı tarixi Zəfər və bu Qələbənin xalqımız üçün əhəmiyyəti barədə məlumat verib.

Tədbirin bədii hissəsindən əvvəl tanınmış tarzən, Əməkdar artist Sahib Paşazadə çıxış edərək 44 günlük Zəfər tarixindən, bu musiqi proqramının mənəvi məzmunundan danışıb. O, həmçinin ifa olunacaq əsərlərin yaranma tarixindən və Azərbaycan muğam sənətinin özünəməxsus xüsusiyyətlərindən geniş şəkildə bəhs edib.

Azərbaycanın Əməkdar artisti Kamran Kərimov (nağara) və pianoçu Səbinə Məmmədovanın da yer aldığı musiqi proqramında Azərbaycan və Avropa musiqisi nümunələri səsləndirilib.

Tanınmış bəstəkar Volfqanq Amadey Motsartın “Rondo” əsərinin tarda ifası isə zalda xüsusi rəğbət və uzunmüddətli alqışlarla qarşılanıb.

Sonda iştirakçılar üçün Azərbaycan mətbəxinə məxsus təamlarla zəngin furşet masası təşkil olunub.

Bu tədbir bir daha göstərir ki, Azərbaycan mədəniyyəti, musiqisi və ruhu Avropanın mərkəzində – Zalsburqda da böyük maraqla qarşılanır, xalqlar arasında dostluq, mədəni əməkdaşlıq və qarşılıqlı hörmətin inkişafına xidmət edir.