Türk Dövlətləri Təşkilatının (TDT) Dövlət Başçıları Şurasının 12-ci Zirvə Görüşü regional gündəliyin mərkəzi mövzusuna çevrilib. Zirvə Görüşü iştirakçıları Türk dünyasında əməkdaşlığın gələcəyinə yönəlmiş, regionda sülh və təhlükəsizliyə töhfə verən mühüm təşəbbüsləri müzakirə ediblər.

Bu fikri Türkiyənin Azərbaycandakı keçmiş səfiri, İMZA-nın (Sosial İnkişafa Dəstək İctimai Birliyi) Türkiyədəki nümayəndəsi Hulusi Kılıç AZƏRTAC-a müsahibəsində bildirib. Onun sözlərinə görə, tədbirin təşkili ən yüksək səviyyədə olub, Qəbələnin gözəlliyi ona xüsusi kolorit bəxş edib.

“Son 16 il ərzində Türk Dövlətləri Təşkilatı üzv və müşahidəçi ölkələr arasında dialoqa və konsolidasiyaya mühüm töhfə verib, geniş Türk dünyası məkanında əməkdaşlıq potensialının üzə çıxarılmasına kömək edib. Müasir TDT sadəcə əməkdaşlıq üçün struktur deyil, mühüm geosiyasi və strateji mərkəzlərdən biridir. Qəbələdə keçirilmiş TDT Zirvə Görüşü Türk dünyasında əməkdaşlıq və inkişaf istəyinin təzahürüdür”, - deyə İMZA İctimai Birliyinin nümayəndəsi türk dövlətləri arasında dialoq və əməkdaşlığın başqa ölkələrə qarşı yönəlmədiyini, TDT-nin isə mehriban qonşuluq, sülh və rifahın təşviq edilməsi üçün bir platforma olduğunu vurğulayıb.

H.Kılıç 2026-cı ildə digərləri ilə yanaşı, TDT ölkələri arasında birgə təlimlərin keçirilməsi təklifini səsləndirən Prezident İlham Əliyevin çıxışını yüksək qiymətləndirib. “Azərbaycan Prezidenti, Ali Baş Komandanın çıxışı türk dövlətləri arasında əməkdaşlığın yeni mühüm istiqamətini müəyyənləşdirdi. Təhlükəsizliyi təmin etmədən və güclü ordu mövcud olmadan qüdrətli dövlətin formalaşdırılması və ölkələrin mütərəqqi inkişafı qeyri-mümkündür”, - deyə keçmiş səfir bildirib.

O, Türkiyə Prezidenti Rəcəb Tayyib Ərdoğanın Zirvə Görüşü iştirakçıları qarşısında qaldırdığı mövzuların əhəmiyyətinə də diqqət çəkib. “Türkiyə liderinin 2024-cü ildə razılaşdırılan “Böyük Türk Dili” modeli və Ortaq Türk Əlifbası ilə bağlı söylədiyi fikirlər xüsusi maraq doğurub”, - deyə H.Kılıç qeyd edib.

Bundan başqa, İMZA İctimai Birliyinin nümayəndəsinin sözlərinə görə, Qazaxıstan Prezidenti Kasım-Jomart Tokayevin TDT ölkələri arasında hərəkətlərin əlaqələndirilməsi və rəqəmsal əlaqənin gücləndirilməsi məqsədilə Kibertəhlükəsizlik Şurasının yaradılması təşəbbüsü maraq doğurub.

“Özbəkistan, Türkmənistan, Macarıstan, Qırğızıstan və ŞKTC liderlərinin çıxışları da məzmunluluq və türk dövlətlərinin qarşılıqlı fəaliyyətinə töhfə vermək istəyi ilə seçilib. Qəbələ Bəyannaməsinin 12 bəndinin əsasını siyasi iradə və gələcək əməkdaşlıq istəyi təşkil edib”, - deyən H.Kılıç Qəbələdə keçirilən Zirvə Görüşünün bütün türk dövlətlərinin maraqlarının reallaşmasına töhfə verəcəyinə ümidvar olduğunu bildirib.