44 günlük Vətən müharibəsi şəhidi İsmayılov Nizaməddin İsmayıl oğlunun məzarı anım günündə ziyarət olunub.

Şəhidin anım günündə ailəsi ilə bərabər Füzuli rayon icra hakimiyyətinin əməkdaşları, təhsil və mədəniyyət işçiləri, qazilər, kənd ziyalıları və sakinlər iştirak ediblər.

Tədbirdə Nizaməddin İsmayılovun şərəfli həyat yolundan danışılıb. Qeyd edilib ki, 1981-ci il yanvarın 10-da Bala Bəhmənli kəndində dünyaya göz açan Nizaməddin yeniyetmə çağlarından hərb sənətinə marağı olub. O, 1999-cu ildə həqiqi hərbi xidmətə ruh yüksəkliyi ilə yollanıb. Xidmətini layiqincə yerinə yetirdikdən sonra Gizir Hazırlığı Məktəbində tağım komandiri müavini kursunu bitirib. 2003-cü ildən N saylı hərbi hissədə xidmətə başlayıb. 2011-ci ildən isə ön cəbhədə yerləşən hərbi hissələrdən birində minaatan batareyada fəaliyyətini davam etdirib. Xidməti dövründə bir çox medal və fəxri fərmanla təltif olunub. Aprel döyüşlərində iştirak edib. Vətən müharibəsində ön sıralarda yer alıb. Cəbhənin yarılmasında şücaəti ilə seçilən Nizaməddin qəhrəmancasına şəhid olub.

Azərbaycanın ərazi bütövlüyünün təmin edilməsi uğrunda döyüş əməliyyatlarına iştirak və döyüş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Respublikasının Prezidenti İlham Əliyevin sərəncamına əsasən Nizaməddin İsmayılov ölümündən sonra "Vətən uğrunda", "Cəsur döyüşcü", "Füzulinin azad olunmasına görə", "Xocəvəndin azad olunmasına görə" medalları ilə təltif edilib.

Nizaməddin İsmayılov ailəli olub, iki övladı yadigar qalıb.