Bu gün Qoşulmama Hərəkatı Gənclər Təşkilatının (QHGT) mənzil-qərargahında Uqanda Respublikasının xarici işlər üzrə dövlət naziri Con Mulimba ilə görüş keçirildi. Görüşün əsas məqsədi təşkilatın inkişaf perspektivlərini müzakirə etmək, gənclərin fəal iştirakı ilə yeni təşəbbüslər irəli sürmək və beynəlxalq əməkdaşlığı daha da möhkəmləndirməkdən ibarət olub. 

Fact-info.az xəbər verir ki, bu fikirləri Azərbaycan Respublikası xarici işlər nazirinin müavini Yalçın Rəfiyev jurnalistlərə açıqlamasında səsləndirib.

O bildirib ki, 2019-cu ildə Azərbaycan Prezidentinin təşəbbüsü ilə əsası qoyulan Qoşulmama Hərəkatı Gənclər Təşkilatı bu gün artıq mühüm beynəlxalq platformaya çevrilib: “Təşkilat gənclər arasında əməkdaşlıq əlaqələrinin genişləndirilməsi, müxtəlif ölkələrdən olan gənclərin birgə layihələr həyata keçirməsi və ortaq təşəbbüslərlə çıxış etməsi baxımından əhəmiyyətli rol oynayır”.

Nazir müavini qeyd edib ki, QHGT-nin mərkəzi qərargahının fəaliyyətə başlaması təşkilatın institusional inkişafı baxımından mühüm addımdır. Burada keçirilən tədbirlər, müzakirələr və təlimlər gənclərin beynəlxalq münasibətlərdə fəal iştirakını təşviq edir, onların intellektual potensialından səmərəli istifadə olunmasına imkan yaradır.

Yalçın Rəfiyev vurğulayıb ki, görüşdə, həmçinin gələcəkdə birgə layihələrin reallaşdırılması, gənclərin müxtəlif qlobal çağırışlara cavab verməsi üçün yeni platformaların yaradılması, eləcə də beynəlxalq dialoq və həmrəyliyin gücləndirilməsi məsələləri diqqət mərkəzində olub.