Qazaxıstanın paytaxtı Astanada ilk Asiya “Silk Way Star” vokal müsabiqəsi keçiriləcək.

Fact-info.az“Kazinform” agentliyinə istinadla xəbər verir ki, bu barədə “Kazmedia ortalığı” studiyasında beynəlxalq musiqi layihəsinin başlanması ərəfəsində keçirilən mətbuat konfransında bildirilib.

Müsabiqədə Azərbaycan, Gürcüstan, Qazaxıstan, Çin, Qırğızıstan, Tacikistan, Türkmənistan, Özbəkistan, Cənubi Koreya və digər ölkələrin nümayəndələri iştirak edir.

Şou bu il iyunun 16-da Çin Xalq Respublikası sədrinin Astanaya rəsmi səfəri zamanı dövlət başçıları Kasım-Jomart Tokayev və Si Cinpinin iştirakı ilə Qazaxıstan Respublikası Prezidentinin Teleradio Kompleksi ilə Çinin “CMG” Media Korporasiyası arasında “Silk Way Star” beynəlxalq layihəsinin yaradılması haqqında Saziş çərçivəsində həyata keçirilir.

Musiqi şousunun çəkilişləri avqustun 20-də başlanacaq. Qrand final noyabrın 22-də Jibek Joly/Silk Way telekanalının birbaşa efirində və müsabiqədə iştirak edən ölkələrin aparıcı telekanallarında yayımlanacaq.

Layihə 10 epizoddan ibarətdir: 9-u qeydə alınmış və canlı yayımda son Qrand şou. Tamaşaçıları unikal duetlər, milli hitlərin ifası, mədəniyyətlərarası əməkdaşlıqlar və iştirakçıların emosional hekayələri gözləyir. Bir buraxılışın müddəti 100 dəqiqədən çoxdur, yayım qazax, Çin və ingilis dillərində planlaşdırılır.

Səsvermə beynəlxalq sistem üzrə 1-dən 12-dək açıq xal hesablanması ilə keçiriləcək. İlk doqquz epizodda qərarlar Çin və Mərkəzi Asiya ölkələrindən olan peşəkar münsiflər heyəti tərəfindən qəbul edilir. Qrand finalda qalibi səslərin kombinasiyası müəyyən edir: münsiflər heyətinin 50 faizi və tamaşaçıların 50 faizi.

Seçimlər mərhələsində 2, 3, 4, 6 və 8-ci epizodların hər birində bir iştirakçı mübarizədən kənarlaşdırılacaq. Finala yalnız 7 artist: səsvermənin yekunlarına görə ən güclü 5 nəfər və ev sahibi ölkənin 2 nümayəndəsi çıxacaq.

Müsabiqədə Azərbaycanı müğənni və aktrisa, “Səs Azərbaycan”ın yarımfinalçısı Səbinə Quluzadə (Səbinə Zadə) təmsil edəcək.

“Silk Way Star”ın möhtəşəm Qrand finalı beynəlxalq yayımla canlı şou formatında keçiriləcək və ilin ən parlaq musiqi hadisələrindən birinə çevriləcək. Qalib iştirakçı “Silk Way Star” titulunu və yaradıcılığını dünya səhnəsində təqdim etmək şansı qazanacaq.