11-17 avqust 2025-ci il tarixlərində Azərbaycan Respublikasının Xankəndi şəhərində yerləşən Qarabağ Universitetində Beynəlxalq Türk Akademiyası, Qarabağ Universiteti, Türkiyə Elmlər Akademiyası (TÜBA) və Azərbaycan Respublikası Elm və Təhsil Nazirliyinin birgə əməkdaşlığı ilə VII Ənənəvi Türk Dünyası Yay Məktəbi keçirilir.

Fact-info.az xəbər veriir ki, Yay məktəbinin məqsədi türkoloji sahədə gənc alimlərin elmi potensialını gücləndirmək, müxtəlif ölkələrdən gələn iştirakçılar arasında bilik və təcrübə mübadiləsini təşviq etmək, həmçinin müasir elmi yanaşmalar və tətbiqi tədqiqat metodlarının öyrənilməsinə şərait yaratmaqdır.

Proqrama Azərbaycan, Qazaxıstan, Qırğızıstan, Özbəkistan, Türkiyə, Şimali Kipr Türk Cümhuriyyəti, İran, Monqolustan və Şimali Makedoniyadan olan, 35 yaşını keçməyən ümumilikdə 30 doktorant və postdoktoral tədqiqatçı qatılır.

11 avqust 2025-ci il tarixində Qarabağ Universitetinin Böyük Konfrans Salonunda keçirilən açılış mərasimində Qarabağ Universitetinin rektoru, dosent, fəlsəfə doktoru Şahin Bayramov, Beynəlxalq Türk Akademiyasının prezidenti, akademik Şahin Mustafayev və Türkiyə Elmlər Akademiyasının prezidenti, professor Muzaffer Şeker çıxış ediblər.

Qarabağ Universitetinin rektoru Şahin Bayramov bildirib ki, Xankəndidə təşkil olunan yay məktəbi türk dünyasında elmi fəaliyyəti sürətləndirəcək və türk dünyasını təmsil edən alimlər arasında birgə tədqiqatları təşviq edəcək mühüm bir imkandır. O, universitetin türk dünyasındakı ali təhsil müəssisələri və elmi qurumlarla beynəlxalq əməkdaşlığı inkişaf etdirməyi hədəflədiyini, proqramın Qarabağ Universitetinin ev sahibliyində təşkil olunmasının tədbirə xüsusi dəyər qatdığını vurğulayıb.

Beynəlxalq Türk Akademiyasının prezidenti, akademik Şahin Mustafayev Qarabağın tarixi və mənəvi əhəmiyyətinə diqqət çəkərək qeyd edib ki, Xankəndinin 30 illik erməni işğalından azad olunması təkcə Azərbaycan üçün deyil, bütün türk dünyası üçün böyük tarixi qələbədir. Türk Akademiyasının türk dünyasının zəngin elmi və mədəni irsinin qorunması və müasir elmi yanaşmalarla inkişaf etdirilməsi istiqamətində fəaliyyətini davam etdirdiyini bildirən akademik Mustafayev sözlərinə belə davam edib: “Türkologiya Yay Məktəbi yalnız nəzəri biliklərin paylaşılması deyil, eyni zamanda gənc alimlər və türkoloqlar arasında davamlı dostluq və əməkdaşlıq körpülərinin qurulmasıdır”.

TUBA prezidenti Muzaffer Şeker çıxışında erməni işğalından azad olunmuş Xankəndində belə bir tədbirdə iştirakçılarla bir arada olmaqdan məmnunluğunu ifadə edərək deyib: “Azadlıq və işğal, təəssüf ki, yaşadığımız dünyanın bir reallığına çevrilib... Türk Dünyası olaraq bu amansız dünyada həmrəyliyi və birliyimizi gücləndirərək irəliləmək məcburiyyətindəyik. Bu mənada təhsil və elmi əməkdaşlıq çox önəmlidir”.

Yay məktəbinin tədris prosesi Azərbaycan, Türkiyə, Qazaxıstan, Qırğızıstan və Özbəkistandan olan, öz sahələrində beynəlxalq təcrübəyə malik alim və mütəxəssislər tərəfindən aparılır. Bir həftə davam edəcək yay məktəbi proqramı iştirakçıların elmi məqalə hazırlamaq, təqdimat etmək və tədqiqat qrantlarından yararlanmaq kimi bir-biri ilə əlaqəli sahələrdə bacarıqlarını inkişaf etdirməyi hədəfləyir.

Təlimlər “Türk Dövlətləri Tarixi”, “Türk Dünyası Arxeologiyası”, “Türk Dünyası Münasibətləri”, “Türk Dünyası İncəsənət və Fikir Tarixi” və “Türk Dialektləri və Ədəbiyyatları” mövzularını əhatə edir.

Musiqi və incəsənət proqramları ilə zənginləşdirilən tədbir çərçivəsində iştirakçılar Xankəndi və Şuşa şəhərlərinə təşkil olunacaq səfərlərdə bölgənin tarixi və mədəni irsi ilə yerində tanış olmaq imkanı əldə edəcəklər.