Yeni Azərbaycan Partiyası Masallı rayon Təşkilatının rəhbərliyi Mahmudavar kənd Ərazi Partiya Təşkilatında yeniyetmə və gənclərlə görüş keçirib. Tədbir iştirakçıları öncə Mahmudavar kəndində Ulu Öndər Heydər Əliyevin abidəsini ziyarət ediblər. Daha sonra YAP Masallı rayon Təşkilatının Mahmudavar Ərazi Partiya Təşkilatında “Canlanır hər şəhər, kənd Qarabağda!” devizi altında tədbir keçirilib. Tədbiri YAP Masallı rayon Təşkilatının sədri Seyfəddin Əliyev açdı. Dahi siyasətçi Heydər Əliyevin və Respublikamızın ərazi bütövlüyü uğrunda gedən döyüşlər zamanı şəhid olan soydaşlarımızın əziz xatirələri 1 dəqiqəlik sükutla yad edildi. Seyfəddin müəllim dedi:

-“Biz, bu gün Mahmudavar kəndində yaşayan bir qrup yeniyetmə və gənclə görüşə gəlmişik. Məlumdur ki, 2020-ci il sentyabrın 27-də başlanan və 44 gün davam edən II Vətən savaşı zamanı Müzəffər Ali Baş Komandan İlham Əliyevin qətiyyəti, Azərbaycan Silahlı Qüvvələrinin gücü sayəsində, həmçinin, 2023-cü il sentyabrın 19-20-də aparılan lokal antiterror əməliyyatları zamanı işğal edilmiş ərazilər düşmən tapdağından azad edildi. Hazırda Qarabağda böyük quruculuq işləri aparılır. Əminəm ki, tezliklə Qarabağ turizm bölgəsi, həmçinin, beyin mərkəzi kimi tanınacaq.

YAP Masallı rayon Təşkilatının Mahmudavar Ərazi Partiya Təşkilatının sədri Kinəxanım Əliyeva çıxışına bu sözlərlə başladı:

-Hörmətli tədbir iştirakçıları, Qarabağın işğaldan azad edilən ərazilərində əmək bulaq kimi qaynayır. Xocalı Beynəlxalq Hava Limanının, həmçinin, Füzuli, Zəngilan və Laçın Hava limanlarının istifadəyə verilməsi dövlətimizin beynəlxalq imicinə əsl dəstəkdir. Azərbaycanın Dövlət Başçısının Rəhbərliyi altında Qarabağda keçirilən beynəlxalq tədbirlərdə  həm də beynəlxalq əməkdaşlıq üçün yeni-yeni perspektivlər açılır.Fəxrlə və böyük ümidlə bildirirəm ki, Xankəndi şəhərində fəaliyyətə başlayan  “Qarabağ” Universiteti bölgənin inkişafına öz töhfəsini verəcək.

 Kinəxanım Əliyeva  həmçinin, YAP Masallı rayon Təşkilatının rəhbərliyinə bu görüş üçün öz təşəkkürünü bildirdi. Mahmudavar kənd tam orta məktəbinin humanitar təmayüllü XI sinif şagirdi, ictimai fəal Leyla Səttarova, Zahid Şahbazov Dövlətimizin Qarabağda apardığı işləri dəstəklədiklərini bildirdilər.

Şamil Sabiroğlu, jurnalist.

06.08.2025.