Rəqəmsal İnkişaf və Nəqliyyat Nazirliyi, İnnovasiya və Rəqəmsal İnkişaf Agentliyinin (İRİA) İsrailin “Technion” Texnologiya İnstitutu ilə birgə təsis etdiyi Azərbaycan Kibertəhlükəsizlik Mərkəzinin (AKM) sayca beşinci “Məzun Günü” keçirilib.

Fact-info.az xəbər verir ki, bu tədris dalğası üzrə 100 yeni kibertəhlükəsizlik mütəxəssisi hazırlanıb.

Tədbirdə əvvəlcə Azərbaycanın Dövlət Himni səsləndirilib.

Tədbirin açılışında rəqəmsal inkişaf və nəqliyyat nazirinin müavini Samir Məmmədov kibercinayətkarlığın artan qlobal iqtisadi təsirləri, süni intellektin kibertəhlükə mühitinə yaratdığı yeni risklər və insan faktorunun kibertəhlükəsizlikdə həlledici rolu barədə danışıb.

İRİA-nın İdarə Heyətinin sədri Fərid Osmanov nitqində 2023–2027-ci illəri əhatə edən informasiya və kibertəhlükəsizlik üzrə dövlət strategiyasının əhəmiyyətini vurğulayıb, rəqəmsal savadlılıq və məlumatların qorunmasının əsas prioritetlərdən olduğunu qeyd edib. O, AKM-in ekosistemin inkişafına verdiyi töhfələri və bu sahədə beynəlxalq təcrübəyə əsaslanan təlimlərin uğurla həyata keçirildiyini diqqətə çatdırıb.

Daha sonra tərəfdaş qurumların, eləcə də “Technion”un nümayəndələri çıxış edərək proqramın əhəmiyyətini, məqsədlərini və gələcək perspektivlərini vurğulayıblar. Tədbirin davamında məzunlardan ibarət komanda təhsil müddətində qazandıqları bilikləri real dünya problemlərinə və mövzularına tətbiq etdikləri yekun layihələrini təqdim ediblər. Daha sonra yüksək nəticə əldə etmiş 2 məzunun mükafatlandırılması baş tutub. Sonda məzun olan 100 tələbəyə tədbirə dəvət edilmiş rəsmi qonaqlar tərəfindən məzun sertifikatları təqdim edilib.

Tədbir çərçivəsində “Capstone” layihəsinin təqdimatı baş tutub. Sonra Xüsusi Rabitə və İnformasiya Təhlükəsizliyi Dövlət Xidmətinin baş idarə rəisi general-mayor Azər Əhədov komanda üzvlərinə mükafatlar təqdim edib.

Daha sonra Azərbaycan Kibertəhlükəsizlik Mərkəzinin fəaliyyətinə dair videoçarx nümayiş olunub.

Sonra Hakaton elan olunub və qalib komandanın üzvlərinə İnnovasiya və Rəqəmsal İnkişaf Agentliyinin İdarə Heyətinin sədri Fərid Osmanov mükafatları təqdim edib.

Yekunda bütün məzunlara sertifikatları təqdim olunub.

Qeyd edək ki, Azərbaycan Kibertəhlükəsizlik Mərkəzinin tələbələri tədris müddətində beynəlxalq mütəxəssislər tərəfindən “Blue team”, “Red team” və “Purple team” qruplarında müvafiq istiqamətlər üzrə təlim keçərək kibertəhlükəsizlik sahəsində ən qabaqcıl strategiyalar, texnologiyalar və yeniliklər haqqında praktiki biliklərə yiyələniblər. İndiyədək Azərbaycan Kibertəhlükəsizlik Mərkəzindən 380 nəfər məzun olub, hazırda isə 6-cı dalğanın 60 tələbəsi təhsilini davam etdirir.