Təhsil Nazirliyinin mətbuat xidmətindən APA-ya verilən məlumata görə, səfərdə iştirak etmiş əcnəbi tələbələr səfər təəssüratlarını bölüşüblər.
 Yeddi ildir, Azərbaycanda yaşayan, Azərbaycan Dövlət Neft və Sənaye Universitetində (ADNSU) təhsil alan Çin vətəndaşı Zhang Guoqinq deyib ki, ötən ilin aprelində burada şiddətli döyüşlər olub: “Bu torpaqlar Azərbaycanın ərazisidir. Müharibə bütün insanlar üçün dəhşətdir. Biz burada dağıdılmış evləri gördük. Eyni zamanda şahidi olduq ki, burada yenidən abadlıq işləri qurulur. Arzu edirəm ki, heç vaxt müharibə olmasın”.
 Azərbaycan Dövlət İqtisad Universitetinin (ADİU) tələbəsi, zimbabveli Qaret Şoho Zimbabve Cocuq Mərcanlıya səfər etdiyi üçün sevindiyini etiraf edib: “Maraqlı səfərimiz oldu. Sakinlər yenidən evlərinə qayıdacaqlar. Bu, çox sevindiricidir. Onlar üçün ev tikilir, qəsəbə salınır”.
 ADİU-da təhsil alan Almaniya vətəndaşı Cens Stefen Bolay bildirib ki, Cocuq Mərcanlıda aparılan işləri gördükləri üçün çox sevinclidirlər: “Xüsusi ilə orada məktəb tikintisinin şahidi olduq. Təhsil çox önəmlidir. Qoy bütün uşaqlar sülh şəraitində yaşasın”.
BDU-da oxuyan pakistanlı Mahmud Athar qeyd edib ki, Cocuq Mərcanlı Azərbaycanın işğaldan azad olunmuş ərazisidir: “İnsanlar tezliklə öz doğma yurduna qayıdıb, burada yaşayacaq. Mən buna uğur kimi baxıram. Arzu edirəm ki, bu, böyük qayıdışın bir hissəsi olsun”.
 ADNSU-da təhsil alan Türkiyə vətəndaşı İbrahim Halil Yentur deyib ki, Cocuq Mərcanlıda erməni vəhşiliyi nəticəsində ziyan çəkmiş kəndə baxıblar: “İndi bu kənddə abadlıq işləri görülür. Mənim Qarabağla bağlı məlumatlarım çoxdur. Türkiyədə də həmişə dostlarla bu məsələ ilə bağlı müzakirələr aparmışıq. Amma indi baş verənləri gözümüzlə gördük. Mən istəyirəm hər zaman sülh olsun. Ermənilərin özünün olmayan torpağa görə günahsız insanlara zülm verməsi hamı tərəfindən pislənilir”.
 ADNSU-nun tələbəsi, yunanıstanlı Elina Mourantovanın sözlərinə görə, artıq 4-cü ildir, Bakıda yaşayır: “Mənim atam azərbaycanlıdır. Biz müharibə, ermənilərin Azərbaycan xalqına etdikləri zülmlər haqqında çox məlumat eşitmişik. Ancaq bu gün bura gəldik və məcburi köçkünlər kimi biz də bu ağır yükü üstümüzdə hiss etdik. Çünki bu insanlar evsiz-eşiksiz qalıb. Ancaq biz indi hər şeyin yenidən bərpa edildiyini görürük. Ümid edirik ki, insanlar yenidən öz evlərinə qayıdacaqlar və həyat yenidən burada bərqərar olacaq”.
 ADİU-nun tələbəsi, Rumıniya vətəndaşı Putilean Raul bildirib ki, ölkəmizdə olduğu müddətdə Azərbaycan xalqının qonaqpərvərliyinin şahidi olub: “Cocuq Mərcanlıya səfərimizdə ermənilər tərəfindən zəbt olunmuş əraziləri gördük. Biz orda evlərin necə dağılmış vəziyyətdə olmasının şahidi olduq. Bununla yanaşı, sevindirici haldır ki, kənddə artıq evlər və məktəblər tikilir. İnsanların təhlükəsiz yaşaması çox yaxşıdır”.
 Mədəniyyət və İncəsənət Universitetində təhsil alan türkiyəli Can Akar qeyd edib ki, ötən il təmas xəttində baş verən hadisələrdən xəbərdar olublar: “Ötən il də burada döyüşlərin olması ilə bağlı xəbərlər eşitdik. Amma heç vaxt ağlıma gəlməzdi ki, biz bu gün burada olarıq. Bu gün qonaq olaraq biz, sahiblər olaraq siz burdasınız. Bunun hər zaman belə olmasını istərdik. Çünki sizin buna haqqınız var”.