Ölkəmizin müstəqilliyinin və ərazi bütövlüyünün bərpası uğrunda gedən döyüşlər zamanı şəhid olan soydaşlarımızın əziz xatirəsi Azərbaycan Respublikasının Prezidenti cənab İlham Əliyev və qədirbilən xalqımız tərəfindən daim əziz tutulur. Belə ki, təkcə Ölkəmizdə deyil, onun hüdudlarından kənarda da şəhidlərin tanıdılması istiqamətində silsilə tədbirlər keçirilir. Bu istiqamətdə müəyyən işlər görən ləyaqətli və səxavətli oğullardan biri hazırda “Azərbaycan Dəmir Yolları” QSC sistemində çalışan Füzuli Valeh oğlu Ələkbərovdur. Füzuli müəllim Tovuz rayonu Çobansığnaq kəndinin yetirməsidir. O, doğulub boya-başa çatdığı kəndin xeyir-şər məclislərində yaxından iştirak edir. Bu yaxınlarda vaxtı ilə yaşadığı kənddə dünyasını dəyişmiş atasının ruhunu şad etmək üçün Ehsan bulağı inşa etdirib.

Daim xeyirxahlıq etməyə tələsən Füzuli müəllim belə bir bulağı işlədiyi idarənin həyətində də inşa etdirib. Onlar 2020-ci il sentyabrın 27-də başlanan və 44 gün davam edən II Vətən savaşı zamanı şəhid olan Müdafiə Nazirliyi Hərbi Polis İdarəsinin əməkdaşı Vaqif İsmayılzadə və Asəf Məmmədovdur. Hər 2 şəhidin atası bu İdarənin əməkdaşlarıdır.

Mayın 11-də şəhidlərin xatirəsinə inşa edilən Ehsan Bulağının açılış mərasimi keçirildi. Mərasimi Respublika Şəhid Ailələrinə “Qayğı” Cəmiyyətinin sədri, xeyirxah insan Müşfiq Əliyev açdı. Dahi siyasətçi Heydər Əliyevin və şəhidlərimizin xatirəsi 1 dəqiqəlik sükutla yad edildi. Müşfiq müəllim qeyd etdi ki, Füzuli Ələkbərovun nəcib təşəbbüsü Azərbaycan Respublikası Rəqəmsal İnkişaf və  Nəqliyyat Naziri Rəşad Nəbiyev, “Azərbaycan Dəmir Yolları” QSC-nin sədri Rövşən Rzayev və Nərimanov rayon İcra hakimiyyətinin başçısı Elgin Həbibullayev tərəfindən dəstəklənib. Müşfiq müəllim həmin məmurlara tədbir iştirakçıları adından təşəkkür etdi.

Şəhid Asəf Məmmədovun atası Mehman bəy və şəhid Vaqif İsmayılzadənin atası Vüqar bəy övladlarının şərəfli ömür yolları barədə məlumat verdilər. “Xocalı Soyqırımını Tanıtma” ictimai birliyinin həmtəsisçisi, jurnalist Şamil Sabiroğlu, II Vətən savaşının qaziləri -Ramil Şirinov və Ceyhun Ağayev, “Yeni Baxış” İctimai Nəzarət Təşkilatının Saatlı  Regional şöbəsinin sədri Mirələkbər Məmmədov, həmin Təşkilatın Qaradağ rayon şöbəsinin sədri Asif Məmmədov və başqaları şəhidlərin tanıdılmasında zəhmətləri olan hər bir şəxsə öz təşəkkürlərini çatdırdılar.

Ehsan bulağını inşa etdirən Füzuli Ələkbərov Azərbaycan adını uca tutan hər bir insana imkanları daxilində dəstək göstərməyə hazır olduğunu bildirdi.

Sonda şəhid Asəf Məmmədov və şəhid Vaqif İsmayılzadənin xatirəsinə ehsan süfrəsi açıldı.

Şamil Sabir oğlu,

Nahidə Vahid qızı