Azərbaycan Milli Elmlər Akademiyasının Məhəmməd Füzuli adına Əlyazmalar İnstitutunda 31 Mart – Azərbaycanlıların Soyqırımı Gününə həsr olunmuş “Ermənilərin azərbaycanlılara qarşı törətdiyi soyqırımları əlyazma qaynaqlarında” mövzusunda elmi sessiya keçirilib. 
İnstitutdan AzərTAc-a bildiriblər ki, əvvəlcə soyqırımı qurbanlarının xatirəsi birdəqiqəlik sükutla yad edilib.
Tədbirdə institut direktorunun elmi işlər üzrə müavini, filologiya elmləri doktoru Paşa Kərimov bu faciənin heç zaman unudulmayacağını söyləyib.
İnstitutun baş elmi işçisi, tarix elmləri doktoru Tahirə Həsənzadə “Ermənilərin Azərbaycan xalqına qarşı törətdiyi soyqırımları tarixi mənbələrdə” mövzunda məruzə ilə çıxış edib. O, Heredotun köçəri adlandırdığı erməniləri Qafqazda, İranda, Türkiyədə dəfələrlə türk xalqına qarşı ən qəddar cinayətkar əməllərə əl atdıqlarını qeyd edib.
Professor Kamandar Şərifov “Mir Möhsün Nəvvabın “1905-1906-cı illərdə еrməni-müsəlman davası” əsərində erməni vəhşilikləri” mövzusunda məruzəsində sovet dövründən erməni vəhşilikləri haqqında əsərlərin çapının mümkün olmadığını nəzərə çatdırıb, yalnız Azərbaycan müstəqillik qazandıqdan sonra arxivlərdə saxlanılan həmin əsərlərin işıq üzü gördüyünü bildirib.
Filologiya üzrə fəlsəfə doktoru Yusif Bağırov “Üzeyir Hacıbəylinin publisistikasında mart soyqırımı” məruzəsində Üzeyir Hacıbəylinin 1918-ci ilədək əsasən felyeton yaradıcılığı ilə məşğul olsa da, həmin il Cümhuriyyətin rəsmi qəzetində ciddi siyasi yazılarla çıxış etdiyini diqqətə çatdırıb.
Sonda elmi sessiyanın materiallarının kitab halında çap edilməsi təklif olunub.