Dünya birliyi regiondakı vəziyyətə daha çox diqqət ayırmaqla və qərəzdən imtina etməklə Cənubi Qafqazda uzunmüddətli sülhün və sabitliyin təmin olunmasına mühüm töhfə verə bilər. Fact-info.az xəbər verir ki, bu barədə türkiyəli ekspert Mehmet Yahya Çiçeklinin “Star” qəzetində dərc olunan Bakı ilə İrəvan arasında sülh perspektivlərini təhlil etdiyi məqaləsində qeyd olunur.

Şərhçi vurğulayır ki, Azərbaycanla sülh sazişinin imzalanmasından ilk növbədə Ermənistan özü faydalanacaq, bununla da Bakı və Ankara ilə münasibətləri normallaşdıraraq, bütün qonşu dövlətlərlə sabit əlaqələri təmin edə biləcək.

Lakin müəllifin fikrincə, Ermənistanda sağlam düşüncənin tərəfdarları ambisiyalı şovinist qüvvələrə qarşı üstünlük qazana bilmir: “Gizli deyil ki, Ermənistandakı radikal dairələrdə və ümumiyyətlə erməni diasporları arasında üçüncü Qarabağ müharibəsinə hazırlıq və bununla bağlı beynəlxalq rəyi formalaşdırmaq ideyası getdikcə geniş yayılır. Regionda etimad mühitinin yaradılmasına əsas maneələrdən biri də Ermənistanın daxili siyasi qüvvələrinin təzyiqləridir”.

Onun sözlərinə görə, Ermənistanın sosial-iqtisadi göstəriciləri və əhalisinin sayını nəzərə alaraq, qonşu Azərbaycana qarşı tab gətirə bilməyəcəyi tam aydın olsa da, bu ölkə silah alışını davam etdirir və bununla da regionda sülh və sabitlik perspektivlərini təhlükə altına atır.

Ekspert qeyd edir ki, İrəvana müdafiə sahəsində dəstək göstərən bəzi dövlətlər Ermənistanda revanşist ruhiyyəsinin artmasına şərait yaradır. O, Fransanın bu məsələdə “etikadan uzaq” mövqeyini xüsusi vurğulayır. Çiçekli yazır ki, Fransa Azərbaycanın ərazi bütövlüyü faktını qeyd-şərtsiz qəbul etmək istəmir və bununla da Ermənistan tərəfini Bakı ilə razılaşmaları uzatmağa təhrik edir: “Əslində, “təhrik etmək” sözü Fransanın və digər ölkələrin niyyətini tam əks etdirmir. Daha doğru desək, burada İrəvanın açıq şəkildə təxribatlara çəkilməsindən söhbət gedir”.

O, Parisin erməni diasporunun əlində oyuncağa çevrildiyini bildirib.

Məqalənin müəllifi, həmçinin Azərbaycanın Ermənistan konstitusiyasının preambulasının dəyişdirilməsi tələbinə də diqqət çəkir. Belə ki, orada Ermənistanın Müstəqillik Bəyannaməsinə istinad olunur.

“Bakı ərazi iddialarını özündə ehtiva edən bir sənədin qəbuledilməz olduğunu açıq şəkildə vurğulayır”, - deyə o qeyd edib.

Məqalədə, həmçinin digər mühüm məsələlərin, o cümlədən, Azərbaycanın eksklavlarının Bakıya qaytarılması, Qərbi Azərbaycan əhalisinin tarixi torpaqlarına qayıdışı və Zəngəzur dəhlizinin açılması mövzularının da aktuallığı qeyd olunur.