Azərbaycan-Kipr Dostluq Cəmiyyəti və ŞKTR Heydər Əliyev Beynəlxalq Mədəniyyət Mərkəzi, Azərbaycan Respublikasının Diasporla İş üzrə Dövlət Komitəsinin dəstəyi ilə ŞKTR-da “Türk Dünyası Novruz Festivalı” keçirəcək.

Fact-info.az xəbər verir ki, bu barədə cəmiyyətin sədri Orxan Həsənoğlu məlumat verib.

“19-23 mart 2025-ci il tarixləri arasında keçiriləcək Festivala  Türkiyə BMM-Azərbaycan Parlamentlərarası əlaqələr üzrə işçi qrupunun rəhbəri Şamil Ayrım, Türkiyə BMM-ŞKTR Parlamentlərarası əlaqələr üzrə işçi qrupunun rəhbəri Orxan Ərdəm və qrup üzvü millət vəkilləri Əhmət Ərbaş və Hüseyin Yaman iştirak edəcəklər. Ayrıca olaraq  Azərbaycan-ŞKTR Parlamentlərarası əlaqələr üzrə işçi qrupunun rəhbəri Cavanşir Feyziyev və qrup üzvü Musa Quliyev qatılacaqlar. Eyni zamanda Azərbaycan ilə birlikdə TÜRKSOY dəstəyi ilə qazax, özbək, qırğız sənətçilər musiqili qonaqlarımız olacaqlar”, - deyə o bildirib.

Orxan Həsənoğlunun sözlərinə görə, Türk Dünyası Novruz Festivalı tədbirləri iki ayrı şəhər və üç bölgədə keçiriləcək. Belə ki, festivalın rəsmi açılışı 20 mart 2025-ci il tarixdə ŞKTR ən böyük mədəniyyət mərkəzlərindən biri olan, Gazimağusa şəhərində yerləşən Rauf Denktaş Mədəniyyət və Kongress Mərkəzində baş tutacaq. Festivalın ikinci günü isə ŞKTR-da təhsil alan yerli və əcnəbi tələbələrin çoxluq təşkil etdiyi Girnə şəhərində Beynəlxalq Final Universiteti Kampüsündə keçiriləcək. Festivalın bağlanış mərasimi isə Lapta bölgəsində yerləşən Heydər Əliyev adına Beynəlxalq Mədəniyyət Mərkəzində keçiriləcək. Tədbirlərə ŞKTR prezidenti Ərsin Tatar, Baş nazir Ünal Üstel, ŞKTR Parlamentinin sədri Ziya Öztürklər, ŞKTR nazirləri, millət vəkilləri, yerli QHT və media mənsubları qatılacaqlar. Bunlarla birlikdə ŞKTR yaşayan Türk Dilli xalqların nümayəndələri və çox sayıda əcnəbi tələbə dəvət olunublar. 

Türk Dünyası Novruz Festivalı zamanı TÜRKSOY-un dəstəyi ilə Qazaxıstan, Özbəkistan, Qırğızıstan, Kipr və Türkiyədən sənətçilər dəvət olunub. Ölkəmizi festivalda millət vəkilləri ilə birlikdə Azərbaycan Respublikasının Əməkdar artisti Elnarə Abdullayeva, Rəşid Behbudov adına Azərbaycan Dövlət Mahnı Teatrının solisti Fəxri Nicat Kazım, Naxçıvan Muxtar Respublikasının Əməkdar artisti, Naxçıvan Dövlət Flarmoniyasının solisti Zülfüqar Mahmudov və Naxçıvan Dövlət Flarmoniyasının solisti Əfsanə Babayeva milli musiqilərimiz ilə töhfə verəcəklər.

Festival günlərində həmçinin ölkəmizi tanıtmaq məqsədi ilə stentlər qurulacaq. Milli mətbəximizdə Novruzun simvolu olan şirniyyatlar qonaqlara təqdim olunacaq.