“Son 23 ildə Türkiyədə kommunikasiya strategiyalarının formalaşması istiqamətində böyük uğurlar əldə edilib. Rəqəmsallaşmadan ən səmərəli və düzgün istifadə edərək, demokratiyanı inkişaf etdirən, qlobal istismar sisteminin fəsadlarını aradan qaldıran və insanlığın rifahı üçün nəticələr yaradan bir media qurmaq üçün var gücümüzlə çalışırıq. Mədəni zənginliyimizi və yüksək intellektual irsimizi diqqət mərkəzinə alaraq, yeni media vasitələrinin dezinformasiya, böhranlar, xaos və qütbləşmə üçün deyil, düzgün informasiya, əmin-amanlıq və təhlükəsizliyin təmini üçün istifadə oluna biləcəyini göstərəcəyimizə inanıram”.

Fact-info.az xəbər verir ki, bu sözləri Türkiyə Prezidenti Administrasiyasının İctimaiyyətlə Əlaqələr Departamentinin rəhbəri Fahrettin Altun deyib.

Rəqəmsallaşmanın Türkiyədəki media ekosisteminə dərindən təsir göstərdiyini bildirən Altun internetin geniş yayılması və sosial media platformalarının populyarlığının artması ilə ənənəvi media istehsal üsullarının yerini yeni məzmun yaradılması modellərinin aldığını vurğulayıb.

Media ekosisteminin sürətli inkişafının həm fürsətlər, həm də çətinliklər yaratdığına diqqət çəkən departament rəhbərinin sözlərinə görə, bu fürsətlər arasında məzmun istehsalçılarının daha geniş auditoriyaya çatması, müxtəlif platformalarda özlərini ifadə edə bilməsi və innovativ layihələrin dəstəklənməsi var: “Digər tərəfdən, bu transformasiya informasiya kirliliyi, etibarlılıq problemləri və rəqəmsal uçurum kimi çətinlikləri də özü ilə gətirir”.