Qubadlı Rayon İcra Hakimiyyətinin təşkilatçılığı ilə əslən Qubadlı rayonunun Çaytumas kəndindən olan şəhid İlqar Əhmədovun anım günü ilə bağlı tədbir keçirilib və ehsan süfrəsi açılıb.

Tədbirdə rayon icra hakimiyyətinin nümayəndələri, şəhid ailələri, şəhid anaları, İlqar Əhmədovun yaxınları və ictimaiyyət nümayəndələri iştirak etdilər.

Hər iki tədbirdə şəhidlərin əziz xatirəsi bir dəqiqəlik sükutla anılıb və Dövlət Himni səsləndirilib.

Tədbir iştirakçıları Sumqayıt şəhər qəbiristanlığında şəhidin məzarını ziyarət edərək, məzar üzərinə gül dəstələri qoyub və dualar oxuyublar. Daha sonra tədbir Çaytumas kənd məktəb-liseyində davam etdirilib və şəhidin adına sinif otağının açılışı olub. Məktəbin şagirdləri tərəfindən vətənpərvərlik mövzusunda şeirlər səsləndirilib.

Tədbirdə çıxış edən Qubadlı Rayon İcra Hakimiyyəti başçısının müavini Allahverdi Haxverdiyev Vətən müharibəsinin Azərbaycanın tarixinə qızıl hərflərlə yazıldığını vurğulayaraq şəhidlərin qəhrəmanlıqlarından danışıb. Qeyd edib ki, 44 günlük müharibə Müzəffər Ali Baş Komandan İlham Əliyevin rəhbərliyi ilə ölkəmizin ərazi bütövlüyünün bərpasını təmin edib. Bu zəfər Azərbaycan xalqının birliyinin, milli ruhunun və ordumuzun gücünün bariz nümunəsidir.

Tədbir iştirakçıları şəhid İlqar Əhmədovun göstərdiyi igidliyi, həyat yolunu və vətənpərvərlik ruhunu yüksək qiymətləndirərək onun haqqında xatirələrini bölüşüblər.

Şəhidin anası Leyla Əhmədova göstərilən diqqət və qayğıya görə Prezident İlham Əliyevə, Birinci vitse-prezident Mehriban Əliyevaya təşəkkür edib.

Xatırladaq ki, İlqar Əhmədov 1978-ci il aprelin 6-da Bakı şəhəri, Rəsulzadə qəsəbəsində anadan olub. O, 2000-ci il yanvarın 26-da hərbi əməliyyat zamanı şəhidlik zirvəsinə ucalıb. Şəhidin xatirəsi yaşadığı evin qarşısında yaradılmış xatirə kompleksi ilə əbədiləşdirilib.