Bu gün Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin icraçı direktoru Aygün Əliyeva  Bakı QHT Resurs və Təlim Mərkəzinin sədri Rauf Zeyni ilə 65 illik yubileyi münasibətilə görüşüb.

Görüş zamanı vətəndaş cəmiyyətinin inkişafı, qeyri-hökumət təşkilatlarının fəaliyyətinin gücləndirilməsi və gələcək əməkdaşlıq perspektivləri müzakirə olunub.

Aygün Əliyeva Rauf Zeynini 65 illik yubileyi münasibətilə təbrik edərək, onun uzun illər ərzində vətəndaş cəmiyyəti sahəsində göstərdiyi xidmətləri yüksək qiymətləndirib. O, Rauf Zeyninin ictimai fəaliyyəti, Azərbaycan xalqının milli maraqlarına xidmət edən təşəbbüsləri, həmçinin QHT sektorunun inkişafına verdiyi töhfələri xüsusi vurğulayıb.

Görüş çərçivəsində Aygün Əliyeva Rauf Zeyninə Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyi adından plaket təqdim edib.

Sonda tərəflər vətəndaş cəmiyyətinin gücləndirilməsi istiqamətində birgə əməkdaşlığın davam etdirilməsinin vacibliyini vurğulayıblar.

Təbrik məktubunda qeyd olunur:

Hörmətli Rauf müəllim,
Sizi 65 illik yubileyiniz münasibətilə ürəkdən təbrik edir, bu əlamətdar gündə Sizə möhkəm cansağlığı, fəaliyyətinizdə uğurlar arzulayıram.
 

Ömrünüzü vətəndaş cəmiyyətinin inkişafına həsr etmiş bir şəxs olaraq hər zaman yadda qalan təşəbbüslərə imza atmışınız və həyatınızın hər dövrü Azərbaycanın ictimai-siyasi həyatında aktiv fəaliyyətlə müşahidə olunub.
Sizin uzun illər boyu davam edən ictimai fəaliyyətiniz, o cümlədən vətəndaş cəmiyyəti sahəsində zəngin təcrübəniz, hər zaman Azərbaycan xalqının milli maraqlarına xidmət edən mütərəqqi təşəbbüslərlə yadda qalıb.
 

Milli QHT Forumunun prezidenti, Demokratik Seçki Mərkəzinin sədri kimi, həm də Narkomaniya ilə mübarizə üzrə Dövlət Komissiyasının üzvü olaraq həyata keçirdiyiniz fəaliyyətlər təqdirəlayiqdir.
 

Hazırda Bakı QHT Resurs və Təlim Mərkəzinin sədri olaraq fəaliyyətinizi uğurla davam etdirirsiniz.
Sizin zəngin təcrübəniz və fədakar əməyiniz hər zaman əməkdaşlıq etdiyiniz Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyi tərəfindən yüksək qiymətləndirilir.
 

Hörmətli Rauf müəllim!
Sizi yubileyiniz münasibətilə bir daha ürəkdən təbrik edirəm və ən səmimi arzularımı çatdırıram!
 

Hörmətlə,
Aygün Əliyeva
Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin icraçı direktoru