Müharibə kimlər üçünsə qazanc mənbəyi, kimlər üçünsə dərd-bəladır. Müharibə - ata-ananın sinəsinə dağ çəkilməsidir, qadınların əksəriyyətinin ərsiz, övladların atasız böyüməsi deməkdir. Araşdırmalara görə, indiyədək dünyada 15 mindən çox müharibə olub. Bu müharibələrdə ölənlərin sayını tam dəqiqləşdirə bilməsək də, onu qeyd edə bilərik ki, sadə əhali müharibə istəmir. Onlar dinc yaşamaq arzusundadırlar. Onlara ölüm saçan müharibə lazım deyil.

Gənc yazıçı-dramaturq Ülviyyə Heydərova qarşısına məqsəd qoyaraq amansız müharibələri lənətləyən əsər yazıb. Azərbaycan Dövlət Akademik Musiqili Teatrının direktoru, Əməkdar incəsənət Xadimi Əliqismət Lalayevin dəstəyilə bu psixoloji dram səhnələşdirilib. 

Quruluşçu rejissoru Leonid Klets olan bu monotamaşanın quruluşçu rəssamı Vüsal Rəhim, musiqi tərtibatçısı və səs rejissoru Məhəmməd Məmmədov, videoqrafı Murad Həsənov, rejissor asistenti Zaur Əliyevdir. 

Dekabrın 18-də həmin tamaşanın premyerası keçirildi. Azərbaycanın Xalq artisti, “Şöhrət” ordenli Şükufə Yusupovanın təqdimatında bu psixoloji dram tamaşaçılara təqdim edildi.

 Bütün sivil dünyanın problemi olan müharibə və onun doğurduğu fitnə-fəsadlar istedadlı aktrisa Şükufə Yusupovanın dili ilə tamaşaçılara çatdırıldı. Şəhid anası obrazını məharətlə oynayan aktrisanın çıxışı dəfələrlə alqışlandı.

Biz də öz növbəmizdə, “İnanıram” monotamaşasına görə həm müəllifə, həm də Azərbaycan Dövlət Akademik Musiqili Teatrının işgüzar kollektivinə təşəkkür edirik.

Şamil Sabiroğlu,

“Xocalı Soyqırımını Tanıtma” ictimai birliyinin həmtəsisçisi, jurnalist.