Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin dəstəyilə “Vətəndaşların Sosial Rifahı Naminə” İctimai Birliyi tərəfindən “Zəngəzur Dəhlizi - Yeni İpək yolunun mühüm hissəsi” adlı beynəlxalq konfrans keçirilib.

Konfransı giriş sözü ilə açan İctimai Birliyin sədri İradə Rizazadə konfrans iştirakçılarını və İpək Yolu üzərində yerləşən 5 ölkədən dəvət olunmuş ekspertləri salamlayaraq, tədbirin mahiyyəti barədə məlumat verib. “Zəngəzur dəhlizinin açılması yalnız Azərbaycanın tərkib hissəsi olan Naxçıvanla yollarının birləşməsi deyil, eyni zamanda regiona və ümumilikdə İpək Yolu üzərində yerləşən ölkələrə iqtisadi, sosial, logistik infrastrukturun inkişafı, mədəniyyətlərarası dialoqun gücləndirilməsi və digər aspektlərdən böyük töhfəsi var. Bu səbəbdən biz də Vətəndaş Cəmiyyəti olaraq, Zəngəzur dəhlizinin açılmasının mahiyyətini xarici ekspertlərin iştirakı ilə beynəlxalq konfrans formatında keçirməyi qərara aldıq”.

Daha sonra Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin icraçı direktoru Aygün Əliyeva çıxış edərək, son illərdə Qərbi Azərbaycan mövzusunun Agentliyin prioritet müsabiqə istiqamətlərindən biri olduğunu və bu istiqamətdə uğurlu layihələrin icra olunduğunu vurğuladı. Konfransın mövzusunun və proqramının ümumi zəngin olması ilə isə tədbirin faydalı və məhsuldar olacağına inamını ifadə edərək konfransın işinə uğurlar arzu edib.

Konfrans aşağıdakı mövzular üzrə 3 paneldə məruzələrlə davam etdirilib:

1. “Zəngəzur dəhlizinin geosiyasi əhəmiyyəti”

Moderator: Dr. Sabit Bağırov – Sahibkarlığa və Bazar İqtisadiyyatının İnkişafına Yardım Fondunun Prezidenti

Çıxışçılar:

- Fərhad Məmmədov - Siyasi şərhçi;

- Qriqoriy Trofimchuk - Politoloq, xarici siyasət, müdafiə və təhlükəsizlik məsələləri üzrə ekspert

2. “Zəngəzur dəhlizinin iqtisadi əhəmiyyəti”

Moderator: Zaur İbrahimli – Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin Müşahidə Şurasının üzvü, “Prioritet” Sosial-İqtisadi Araşdırmalar Mərkəzinin sədri

Çıxışçılar:

- Dr. Sabit Bağırov – Sahibkarlığa və Bazar İqtisadiyyatının İnkişafına Yardım Fondunun Prezidenti;

- Cengizhan Zhanaltay – Avrasiya Araşdırma İnstitutunun müdir müavini;

- Gülsel Səfərova – BMT-nin Ərzaq və Kənd Təsərrüfatı üzrə Təşkilatının Naxçıvan üzrə nümayəndəsi

3. “Zəngəzur dəhlizinin açılmasının digər əhəmiyyətli aspektləri”

Moderator: Nədimə Rəhimli – “Vətəndaşların Sosial Rifahı Naminə” İctimai Birliyinin sədr müavini

Çıxışçılar:

- Dosent, Dr. Suat Beylur – Avrasiya Araşdırma İnstitutunun rəhbəri;

- Dosent Farhod Mahmadshozada – Hüquq elmləri namizədi, Moskva Elmi Tədqiqat İnstitutunun Düşənbə filialının Humanitar məsələlər kafedrasının müdiri;

- Dona Tursunova – Vətəndaş Cəmiyyəti nümayəndəsi