Son klinik sınaq nəticələrinə görə, ev şəraitində beyin stimulyasiyası müalicəsi ağır və orta dərəcəli depressiyanın effektiv və təhlükəsiz şəkildə yüngülləşdirilməsinə kömək edə bilər.

Tədqiqatın nəticələri, qeyri-invaziv beyin stimulyasiyası ilə müalicə olunan xəstələrdə depressiyanın remissiyası və müalicəyə cavab reaksiyasının üç dəfə daha yüksək olduğunu göstərir.

Tədqiqatçılar bu innovativ müalicə üsulunun yaxın gələcəkdə depressiya kimi əhval pozğunluqlarından əziyyət çəkən xəstələr üçün ümidverici bir seçim ola biləcəyini bildiriblər.

Tədqiqatda depressiya diaqnozu qoyulmuş 174 nəfər iştirak edib. İştirakçılar təsadüfi olaraq iki qrupa bölünüb və 10 həftə ərzində müalicə kursu alıblar. Bir qrup transkranial - birbaşa cərəyan stimullaşdırması (tDCS) ilə müalicə olunub, digəri isə bu müalicəni qəbul etməyib. Stimulyasiya alan xəstələr ilkin üç həftədə beş dəfə 30 dəqiqəlik seans, sonrakı yeddi həftə ərzində isə həftədə üç dəfə eyni uzunluqda seans keçiriblər. Transkranial birbaşa cərəyan stimullaşdırılması, baş dərisinə iki elektrod vasitəsilə 0,5-2 milliamper arasında cərəyanın tətbiqi ilə həyata keçirilir.

Maraqlıdır ki, bu terapiya ev şəraitində öz-özünə tətbiq edilib. Tədqiqat nəticələrinə əsasən, stimullaşdırma ilə müalicə alanların 45 faizi tamamilə sağalır, bu isə nəzarət qrupunun yalnız 22 faizində müşahidə olunub. (Azərtac)