Azərbaycan Vətən müharibəsi və 2023-cü il antiterror tədbirləri nəticəsində öz ərazi bütövlüyünü və tarixi ədaləti hərbi-siyasi yolla bərpa etdikdən sonra dünya birliyindəki reytinqi daha da yüksəldi. Cəmi 32 illlik müstəqillik tarixi olan ölkəmizin bütün sahələr üzrə sürətli inkişafını və dünya birliyinə sürətli inteqrasiyasını həzm edə bilməyən bəzi dövlətlər və təşkilatlar tərəfindən təzyiq və təhdidlərə məruz qalması beynəlxalq aləmdə baş alıb gedən ikili standartların, islamofobiyanın, azərbaycanofobiyanın və türkofobiyanın nəticəsidir. Ümumiyyətlə, 44 günlük Vətən müharibəsindəki tarixi Qələbəmizdən sonra ABŞ və Avropanın qanunverici orqanlarında, institutlarında, müəyyən ekspert dairələrində, həmçinin media qurumlarında Azərbaycanın “cəzalandırılması” ilə bağlı müzakirələrə, təhdid və təzyiqlərə start verildi.

Bu fikirləri Bakı Dövlət Universitetinin müəllimi, Azərbaycan Vəkillər Kollegiyasının üzvü Polad Mehdiyev bildirib.

Hüquqşünas son illər anti-Azərbaycan qüvvələr, Qərbin və Avropanın ermənipərəst diplomatları, həmçinin bəzi qərəzli beynəlxalq təşkilatlar tərəfindən ölkəmizə qarşı ədalətsizliyin, təzyiq və təhdidlərin artığını bildirib. O, bunun əsas səbəbinin Azərbaycanın ərazi bütövlüyünü və suverenliyini öz qüvvəsi ilə bərpa etməsi, Qarabağda genişmiqyaslı yenidənqurma, abadlıq-tikinti işlərinə start verilməsi, keçmiş məcburi köçkünlərin doğma yurdlarına təhlükəsiz qaytarılması və bütün sahələr üzrə sürətli inkişafının qəbul edilməməsi ilə əlaqələndirib. Polad Mehdiyev ABŞ kimi qüdrətli dövlətin də ölkəmizə qarşı qərəzli mövqeyindən təəssüfləndiyni bildirib.

P.Mehdiyev bir sıra faktları diqqətə çatdırıb. Bildirib ki, 2023-cü il sentyabrında ABŞ Konqresində Laçın yolundakı vəziyyətlə bağlı keçirilən dinləmə zamanı Azərbaycan hökuməti ermənilərə soyqırımı törətmə cəhdində təqsirləndirilmişdi. Halbuki soyqırımını ermənilər azərbaycanlılara qarşı törədib. Həmçinin “Azadlığa Dəstək Aktı”na 907-ci düzəlişin ləğvinə, humanitar yardım dəhlizi aktının və Qlobal Maqnitski aktı ilə sanksiyaların tətbiq olunmasına çağırış edilmişdir: “Bundan bir həftə sonra, sentyabrın 14-də yenə də Konqresdə Qarabağdakı vəziyyətlə bağlı keçirilmiş ilk dinləmə zamanı dövlət katibinin müavini vəzifəsini icra edən Yuri Kim Azərbaycanın mümkün antiterror tədbirinə işarə vuraraq, “Qarabağ xalqına qarşı heç bir əməliyyata və hücuma dözməyəcəyi”ni bildirmişdi. Noyabrın 15-də bu dəfə də ABŞ Konqresində Azərbaycan əleyhinə ikinci dəfə keçirilmiş “Qarabağ dinləmələri” zamanı Dövlət Departamentinin köməkçisi Ceyms O`Brayen antiterror tədbirləri ilə əlaqədar olaraq, ABŞ-ın Azərbaycana hərbi yardımı dayandırdığını və bir neçə yüksək səviyyəli görüşləri ləğv etdiyini demişdi. Xarici Əlaqələr Komitəsinin sədri Tom Kin isə sentyabrın 19-da keçirilən antiterror tədbirlərini hərbi əməliyyat adlandıraraq, Azərbaycan və Ermənistan arasında son illər ərzində baş verən müharibənin nəticələrindən və Azərbaycanın Qarabağda güc tətbiq etməsindən məyus olduğunu bildirmişdi. Dinləmələrdən bir gün sonra isə ABŞ Senatı “2023-cü il Ermənistan Müdafiə Aktı”nı qəbul etmiş, “Azadlığa Dəstək Aktı"na 907-ci düzəlişin icrasını dayandırmışdı. Bu sənədlə Azərbaycana hərbi yardımın qadağan olunması nəzərdə tutulmuş, Ermənistana isə xaricdən hərbi məqsədlərlə maliyyənin ayrılmasına icazə verilmişdi”.

Hüquqşünas Fransanın da ölkəmizə qarşı ədalətsiz mövqeyindən söz açaraq deyib ki, bu ölkə sanki öz gözündəki tiri görməyib, başqa ölkələrin gözündə tük axtarır. Avropa İttifaqının Xarici Əlaqələr və Təhlükəsizlik Siyasəti üzrə ali nümayəndəsi, Aİ Komissiyasının vitse-prezidenti Cozep Borrel “qərəz estafeti”ni davam etdirmiş, Azərbaycana qarşı qeyri-obyektiv mövqe sərgiləyərək bildirmişdir ki, “Ermənistanın ərazi bütövlüyünün pozulması yolverilməzdir və bu, Azərbaycanla münasibətlərimiz üçün ciddi nəticələrə səbəb olacaq”. Bundan əvvəl isə Aİ-nın rəsmisi bəyanatla çıxış edərək, Azərbaycan tərəfindən keçirilən antiterror tədbirləri zamanı erməni separatçılarına açıq dəstək göstərmiş, “Azərbaycanın Qarabağın erməni əhalisinə qarşı hərbi əməliyyatını” pislədiyini bildirmişdi.

P.Mehdiyev AŞPA-nın da ölkəmizə qarşı ədalətsiz, yalan və qərəzli mövqe nümayiş etdirməklə siyasi riyakarlığını ört-basdır edə bilmədiyini diqqətə çatdırıb. Deyib ki, 19 il ərzində işğalçı ölkəni adı ilə çağırmaqda özündə cürət tapmayan AŞPA işğala məruz qalmış ölkəni - Azərbaycanı ittiham edərək oyuncaq qurum olduğunu təsdiqlədi və özünü gülünc vəziyyətinə qoydu. AŞPA qış sessiyasının açılışında ölkəmizin nümayəndə heyətinin mandatını təsdiq etməməklə antidemokratikliyini, saxtakarlığını və riyakarlığıni ört-basdır edə bilmədi. Bu təşkilat kimlərinsə əlində oyuncağa çevrildiyini, istənilən ölkə barəsində qərəzli qərarlar qəbul etmək sifarişini yerinə yetirməyə hazır olduğunu nümayiş etdirdi.

“ABŞ Senatında və Konqresində, həmçinin Avropa Parlamentində Azərbaycan əleyhinə keçirilən dinləmələrdə irəli sürülən ağır ittihamların ardınca, Avropa Şurasında da eyni tezislərlə Ermənistanın açıq şəkildə müdafiəsi və Azərbaycan parlament nümayəndə heyətinin etimadnaməsinin təsdiqlənməməsi, hər şeydən əvvəl bir gerçəyi ortaya qoyur ki, rəsmi Vaşinqtonla Avropa İttifaqının iki qurucu üzvü – Fransa və Almaniya arasında koordinasiya olunmuş şəkildə həyata keçirilən vahid Cənubi Qafqaz strategiyası mövcuddur. Bu strategiyada isə Azərbaycan dost hesab edilmir. Bütün bunlara baxmayaraq, hər hansı təhdid və təzyiq vasitələri Azərbaycanı tutduğu yoldan döndərə bilməz”, - deyə P.Mehdiyev vurğulayıb. (azertag.az)