Ümummilli Lider Heydər Əliyevin 100 İllik yubileyi çərçivəsində ABŞ-ın Kaliforniya ştatının San Xose şəhərində, Azərbaycanın Müstəqilliyinin Bərpası Günü və Zəfər Günü münasibətilə tədbir təşkil olunub.

Ölkəmizin Los-Ancelesdəki baş konsulluğundan bildiriblər ki, tədbirdə Azərbaycanın Dövlət Himni səsləndirildikdən sonra Ulu Öndər Heydər Əliyevin və Vətən uğrundan canından keçən şəhidlərimizin ruhu birdəqiqəlik sükutla yad edilib.

Şimali Kaliforniya Azərbaycan Mədəniyyəti Cəmiyyətinin rəhbəri Aynur Ağayeva iştirakçılara ölkəmizin tarixində əlamətdar olan hadisələr barədə danışıb. Müstəqilliyinin bərpasından ötən müddətdə Azərbaycan Respublikasının qazandığı uğurlar barədə söhbət açan A.Ağayeva bu il 100 illik yubileyini qeyd etdiyimiz Ümummilli Lider Heydər Əliyevin müasir Azərbaycanın dövlət quruculuğunda, bərpasında və möhkəmlənməsində rolu və Zəfərimizlə yekunlaşan 44 günlük Vətən müharibəsi, ərazi suverenliyimizin tam bərpası ilə bağlı geniş məlumat verib.

Azərbaycanın Los-Ancelesdəki baş konsulu Ramil Qurbanov 1991-ci ildə öz müstəqilliyini bərpa etmiş Azərbaycanın böyük çətinliklərlə üzləşdiyini, ancaq 1993-cü ildə hakimiyyətə qayıdan Ulu Öndər Heydər Əliyevin apardığı uğurlu daxili və xarici siyasət nəticəsində ölkəmizin böyük bəlalardan qurtulduğunu, Azərbaycanın bütün sahələrdə inkişafı üçün möhkəm təməllərinin qoyulduğunu vurğulayıb. O, məhz bu təməllər üzərində qurulmuş müstəqil Azərbaycanın daha da güclənməsi və Müzəffər Ali Baş Komandan Prezident İlham Əliyevin rəhbərliyi, rəşadətli Azərbaycan Ordusunun şücaəti ilə 2020-ci ildə torpaqlarını işğaldan azad etməsi və 2023-cü ildə suverenliyimizin tam bərpa edilməsi ilə tarixi ədalətin əldə olunduğunu diqqətə çatdırıb.

Tədbirdə, həmçinin Ulu Öndər Heydər Əliyevin həyatı və Azərbaycan tarixində oynadığı əhəmiyyətli rolu haqqında şəkillərdən ibarət sərgi təşkil edilib.

Konsert proqramı ilə davam edən tədbirdə Azərbaycan Televiziyasının solisti, 6-cı “Muğam” Televiziya Müsabiqəsinin qalibi Almaxanım Əhmədlinin ifasında “Sarı Gəlin”, “Qaragilə” və digər xalq mahnıları dinlənilib. Daha sonra icma üzvlərinin və azyaşlılardan ibarət Azərbaycan Rəqs Ansamblının ifasında xalq rəqslərimiz təqdim olunub.

Qonaqlar Azərbaycan mətbəxinin ləziz təamları və şirniyyatları, həmçinin Zəfər Yolu kitabı ilə tanış olublar.