Azərbaycan Milli Elmlər Akademiyasının (AMEA) Arxeologiya və Etnoqrafiya İnstitutunda Avropa İttifaqının “Mədəniyyət sektorunun siyasəti və idarə olunması sisteminin modernləşdirilməsində Azərbaycan Respublikasının Mədəniyyət və Turizm Nazirliyinə dəstək” adlanan “Tvinninq” layihəsinin müşaviri Alessandro Bianki ilə görüş keçirilib.
Görüşdə A.Bianki layihənin əhəmiyyətindən danışıb. Qeyd edilib ki, ona həvalə olunmuş layihənin məqsədləri sırasına Azərbaycanda tarixi abidələrin qorunmasında dövlət orqanlarının fəaliyyəti, funksiyaları və əməkdaşlığı barədə informasiya, ortaya çıxan problemlərin çözülmə mexanizmi kimi məsələlər daxildir. Bu kontekstdə bütövlükdə AMEA-nın, xüsusilə də Arxeologiya və Etnoqrafiya İnstitutunun statusu və funksional rolu önəmli yer tutur.
İnstitutun direktoru, professor Maisə Rəhimova tarixi abidələrin qeydiyyatı, tədqiqi və mühafizəsində rəhbərlik etdiyi elm müəssisəsinin Mədəniyyət və Turizm Nazirliyi, digər dövlət orqanları, həmçinin onların yerli strukturları ilə əlaqələndirilmiş əməkdaşlığından söz açıb.
M.Rəhimova Azərbaycanın işğal altında olan torpaqlarında tarixi abidələrin məqsədli məhv edilməsi problemini xüsusi qeyd edib.
İnstitutun direktorunun elmi işlər üzrə müavini, tarix üzrə fəlsəfə doktoru Nəcəf Müseyibli tarixi abidələrin müəyyənləşdirilməsi, tədqiqi və mühafizəsində Arxeologiya və Etnoqrafiya İnstitutunun hüquqi statusunu müəyyən edən hüquqi-normativ baza haqqında məlumat verib.(AZƏRTAC)