“Şəhid anaları” Cəmiyyəti və Respublika Qadınlar Cəmiyyətinin Nərimanov rayon bölməsinin birgə təşkilatçılığı ilə Azərbaycanın Milli Qəhrəmanı Gültəkin Əsgərovanın xatirəsi yad edilib. Tədbirdə yeni çapdan çıxmış “Gültəkin” kitabının da təqdimatı keçirilib.
Milli Qəhrəmanın anası Rəfiqə Əsgərova qızı haqqında kövrək xatirələrini bölüşüb.
Tədbirdə vaxtilə Gültəkinlə birgə cəbhədə, odun-alovun içində, çiyin-çiyinə baş həkim kimi fəaliyyət göstərən Ramiq Məhərrəmov bildirib ki, Şuşa, Turşsu, Laçın, Əsgəran, Naxçıvanik istiqamətlərində gedən hərbi əməliyyatlarda Azərbaycan əsgərinə ilk tibbi yardım göstərərək, onları ölümün pəncəsindən qurtaran Gültəkin Əsgərova döyüşlərin birində düşmən gülləsinə tuş gəlib.
Milli Məclisin deputatı Adil Əliyev, Respublika Qadınlar Cəmiyyətinin (RQC) sədri Bahar Qasımova və digər çıxış edənlər bildiriblər ki, dövlətimiz igid Vətən qızına layiq olduğu ən yüksək adı verib. Belə ki, ulu öndər Heydər Əliyevin müvafiq Fərmanı ilə yaralı əsgərlərin həyatının xilas edilməsində göstərdiyi şəxsi igidlik və şücaətə görə tibb xidməti baş leytenantı, şəhid Gültəkin Əsgərova Milli Qəhrəman adına layiq görülüb.
Diqqətə çatdırılıb ki, kitabda qəhrəman haqqında müxtəlif illərdə qəzet və jurnallarda dərc edilmiş məqalələr və onun igidliyini tərənnüm edən şeirlər toplanıb.
Nəfis şəkildə çap edilmiş “Gültəkin” kitabı yetişməkdə olan nəslin vətənpərvərlik ruhunda tərbiyə edilməsinə böyük təkan verməklə yanaşı, xalqımızın qəhrəmanlıq tarixinə yeni bir töhfədir.
Şəhidin qızı Əminə Yıldırım şərəfli döyüş yolu keçmiş anası həkim G.Əsgərovanın xatirəsini uca tutduqları üçün tədbirin təşkilatçılarına və iştirakçılarına minnətdarlığını bildirib.
Gültəkin adını daşıyan şəhidin nəvəsi öz nənəsinin igidliyindən qürur duyduğunu bildirib, “Bakı” haqqında şeir söyləyib. (AZƏRTAC)