Azərbaycan Respublikası Prezident Administrasiyasının dəstəyi ilə işıq üzü görən kitabın layihə rəhbəri və baş redaktoru Musa Mərcanlı, şef redaktoru isə Andrey Vasilyevdir. 3 hissədən ibarət olan kitabda Vətən müharibəsini şərtləndirən amillər, Azərbaycan Silahlı Qüvvələrinin modernləşməsi, güclənməsi istiqamətində atılan addımlar, 44 günlük Vətən müharibəsi, eləcə də torpaqlarımızın işğaldan azad edilməsindən sonra Ali Baş Komandan, Azərbaycan Respublikasının Prezidenti İlham Əliyevin azad edilmiş ərazilərə səfərlərindən geniş bəhs olunur.

Ümumiyyətlə, "Ərəfə", "Vətən müharibəsi" və "Qayıdış" bölmələrindən ibarət olan kitabın əsasını təşkil edən materiallarda dövlətin və onun başçısı-Azərbaycan Respublikasının Prezidenti İlham Əliyevin fəaliyyət xətti aydın izlənilir. Kitabda oxucuya çatdırılan əsas məqamlardan biri də ondan ibarətdir ki, İlham Əliyev bu fəaliyyətin əsas hərəkətverici qüvvəsidir. Onun iradəsi və liderlik keyfiyyətləri, strateji məqsədlərlə düşünmək və onlara çatmaq bacarığı. Möhkəm siyasi və mənəvi mövqeyi ölkənin inkişaf sürətini müəyyən edib, onun dünya miqyasında tanınmasını, Vətən müharibəsində qələbəsini təmin edib.