AZƏRTAC xəbər verir ki, bu sözləri ATƏT Parlament Assambleyasının yay sessiyası çərçivəsində Demokratiya İnsan haqları və humanitar məsələlər Komitəsinin onlayn iclasındakı çıxışında Milli Məclisin deputatı Ülviyyə Ağayeva deyib.

Milli Məclisin deputatı Azərbaycanın Kəlbəcər rayonunda baş verən son hadisələrdən danışaraq deyib: “Çoxunuz yəqin ki, mətbuatda bir neçə həftə əvvəl Azərbaycanın Kəlbəcər bölgəsində mina partlayışı nəticəsində iki azərbaycanlı jurnalistin və bir məmurun həlak olması xəbəri ilə qarşılaşmısınız. Həmin hadisə nəticəsində dörd nəfər də yaralanıb. Bu mina partlayışından bir həftə əvvəl, Ermənistan Silahlı Qüvvələrinin bir kəşfiyyat-təxribat qrupu, azad edilmiş torpaqlarda minalar yerləşdirmək üçün Ermənistan-Azərbaycan sərhədindəki Azərbaycanın Kəlbəcər bölgəsi ərazisinə keçməyə cəhd etdi. 30 ilə yaxın davam edən işğal dövründə Azərbaycan torpaqları Ermənistan tərəfindən ciddi şəkildə minalanıb. Bu, normal həyata qayıtmamaq üçün edilib. Mülki infrastrukturdan tutmuş bütün kanallara, yol qovşaqlarına, kənd və şəhər yollarına, həyət girişlərinə, qəbiristanlıqlara və çay sahillərinə qədər hər yer minalanıb”.

“Ermənistan hökumətinin də imzaladığı üçtərəfli Bəyanatdan bir ay sonra Azərbaycana terror məqsədilə göndərilən təxribat qrupunun üzvləri “hərbi əsir” hesab edilə bilməz”, - deyən Ülviyyə Ağayeva qeyd edib ki, noyabr ayından bəri erməni təxribat kəşfiyyat qruplarının bir neçə üzvü Ermənistan-Azərbaycan sərhədini keçməyə cəhd edib. “Niyə?! Bu suala cavab verə bilərəm: məqsədləri Azərbaycan hərbi qulluqçularına və mülki şəxslərə qarşı bir sıra terror hücumları həyata keçirmək olub. Təəssüf ki, beynəlxalq ictimaiyyətin Ermənistanın özbaşınalığına və vəhşiliyinə qeyri-adekvat reaksiyası bu ölkəni qanun pozuntularına davam etməyə sövq edir. Ermənistanın minalanmış ərazi xəritələrini təhvil verməkdən imtina etməsi və təxribat, revanşizm mövcud bütün beynəlxalq normaların pozulmasıdır və jurnalistlər də daxil olmaqla bir çox insanın həyatını təhlükə altına qoymaqdadır”, - deyə o əlavə edib.

Milli Məclisin deputatı vurğulayıb ki, Azərbaycan beynəlxalq humanitar hüququn müddəalarında və 10 noyabr üçtərəfli Bəyanatında nəzərdə tutulan humanitar tədbirləri həyata keçirməyə davam edir. Ermənistan tərəfini də oxşar yanaşma nümayiş etdirməyə və öhdəliklərini yerinə yetirməyə çağırırıq.

Ülviyyə Ağayeva deyib: “Bu cinayətkar hərəkətlər səbəbindən mülki şəxslər və media nümayəndələri həyatlarını itirdi. Ermənistandan növbəti itkilərin qarşısını almaq üçün Azərbaycan ərazilərinə qoyulmuş mina xəritələrinin açıqlanmasını tələb edirik. Əminəm ki, bu, bölgədə ədalət, təhlükəsizlik, sabitlik və əlbəttə ki, uzunmüddətli sülhün bərqərar olmasına töhfə verəcək”.