İlk növbədə, unutmayaq ki, Türkiyə NATO-nun ən etibarlı və güclü üzvüdür. Qara dəniz, Aralıq dənizi və Mərmərə dənizinə çıxışı olan Türkiyə, həmçinin Montrö Konvensiyasına əsasən Bosfor və Dardanel boğazlarına nəzarət edir. Dünya dövlətlərinin ordu reytinqinə baxsaq, NATO-da ABŞ-dan sonra ikinci ən güclü ordu məhz Türkiyədədir. Türkiyə Respublikası İslam dünyasında Pakistandan sonra ikinci, türk dövlətləri arasında isə ən güclü silahlı qüvvələrə malik dövlətdir.

Fact-info.az-ın məlumatəna görə, bu fikirləri AZƏRTAC-a açıqlamasında siyasi ekspert Elşən Məcidov söyləyib.

Şuşa Bəyannaməsinə məkan obyektivindən münasibət bildirən siyasi ekspert deyib: “Nəzərə alaq ki, Türkiyə Prezidenti Azərbaycanın 44 günlük müharibə zamanı azad etdiyi, mədəni və strateji baxımdan vacib əhəmiyyət kəsb edən Şuşa şəhərinə səfər edib. Prezident Ərdoğanın Şuşaya gəlişi və gələcəkdə burada Türkiyənin baş konsulluğunun açılması Dağlıq Qarabağın statusu haqqında spekulyasiyalar üzərindən daha bir xətt çəkir. Şuşa Bəyannaməsində hərbi-strateji məsələlər, qarşılıqlı müdafiə öhdəlikləri, o cümlədən konsulluğun açılması Azərbaycanı, o cümlədən Şuşanı Ermənistan və kənar qüvvələrin mümkün təcavüzündən qorumaq məqsədi daşıyır. Çünki konsulluq və ya səfirlik aid olduğu ölkələrin əraziləri hesab olunur. Konsulluğu olan əraziyə qarşı mümkün hərbi təcavüz isə Türkiyəyə qarşı hərbi təcavüzə bərabərdir. O zaman belə qənaətə gələ bilərik ki, Türkiyəyə qarşı təhdid NATO-ya qarşı çıxmağa bərabərdir”.

Görüşün və Şuşa Bəyannaməsinin imzalanmasının vaxtının da olduqca önəmli olduğunu bildirən ekspert deyib ki, burada maraq doğuran digər məqam proseslərin ABŞ Prezidenti Co Bayden ilə Türkiyə Prezidenti Rəcəb Tayyib Ərdoğan arasında görüşdən sonra, həmçinin Bayden-Putin görüşündən əvvəl baş tutumasıdır. Bəyannamənin Co Baydenlə söhbətdən sonra imzalanması dolayı yolla bu prosesə ABŞ-ın diplomatik və siyasi dəstəyinin olması anlamına gəlir. Həmçinin ehtimal etmək olar ki, görüş çərçivəsində ABŞ Cənubi Qafqazda öz maraqlarını Türkiyə vasitəsilə təmin etmək üçün onunla razılığa gəlib.