Beynəlxalq təşkilatların illərlə həll edə bilmədiyi problemi Azərbaycan Ordusu döyüş meydanında həll etdi. 2020-ci ilin 8 noyabr tarixi Zəfər Günü kimi Azərbaycan xalqının yaddaşına köçdü. Bütün dünya Azərbaycan xalqının, dövlətinin və ordusunun qüdrətinə valeh oldu.

Prezidentin təşəbbüsü və Heydər Əliyev Fondunun təşkilatçılığı ilə ruhumuzun şəhəri olan Şuşada möhtəşəm “Xarıbülbül” festivalı keçirildi. Bu festival azərbaycançılığın qüdrəti kimi izlənildi. Festivalda ölkə başçımız dedi: “Vətən müharibəsi bir daha onu göstərdi ki, Azərbaycanda bütün xalqlar dostluq, qardaşlıq, həmrəylik şəraitində yaşayır və bu 44 günlük müharibə bir daha onu göstərdi ki, ölkəmizdə milli birlik, milli həmrəylik vardır”. Bu fikirlər Azərbaycanın tolerant dövlət olduğunun bir daha təsdiqi idi.

Bu fikirləri Milli Məclisin deputatı Səbinə Xasayeva bildirib.

Deputat qeyd edib ki, Azərbaycan Prezidenti İlham Əliyevin işğaldan azad edilmiş ərazilərə səfərləri quruculuq, yenidənqurma işlərinin sürətlə aparılacağının təsdiqidir. Dövlətimizin başçısının mayın 28-də Ağdam rayonuna səfəri və məhz Respublika Günündə burada mühüm obyektlərin təməlini qoyması Azərbaycanın öz əzəli torpaqlarına sahib çıxmasının bariz nümunəsidir. Səfər zamanı ölkə başçımız diqqəti erməni vəhşiliyinə yönəldərək Ermənistanın işğal siyasətini bir daha ifşa etdi.

“Azad edilmiş ərazilərimizdə şəhərlər, kəndlər dövlətimizin başçısı İlham Əliyevin rəhbərliyi ilə, böyük tarixi şəxsiyyət Heydər Əliyevin ideyalarına böyük sədaqətlə ilə yenidən qurulacaq.

Ağdam da, Kəlbəcər də, Cəbrayıl da, Füzuli də, Zəngilan da, Qubadlı da yenidən qurulacaq və gözəlləşəcək”, - deyə Səbina Xasayeva bildirib.